Туман ҳокимлиги матбуот хизмати ахборотига кўра, умумий майдони 20,9 гектар бўлган ер участкаси «Чинкелди» маҳалласидаги «Саидвали ҳожи» фермер хўжалигига тегишли бўлиб, унинг 8 гектарига қулупнай экилган (ижтимоий тармоқларда тарқалган видеоларда 9 гектар дейилган). Деҳқонларга оғзаки келишув асосида ва ҳужжат расмийлаштирмасдан суб-ижарага берилган ерлар давлат эҳтиёжлари учун олиб қўйилган.
«Gazeta.uz» нашри Қибрай тумани ҳокимлигига таяниб хабар беришича, бу ерлар «Янги Ўзбекистон» боғи, «Истиқлол» мажмуаси ва бошқа объектларни қуриш учун ажратилган ҳудуднинг бир қисмидир. Янги боғни барпо этиш ҳақида кўрсатма берилгач, деҳқонларга огоҳлантириш хатлари юборилган. Ҳокимлик ахборотида таъкидланишича, улар билан келишувлар имзоланган ва далолатномалар расмийлаштирилган.
Айни пайтда мутахассислар етказилган зарарни баҳоламоқда. Шунингдек, дала эгаларига йиғилмаган қулупнай ҳосили учун бозор нархида товон пули тўланиши кутилмоқда. Ҳокимликнинг таъкидлашича, ҳосил унчалик катта бўлмаган, чунки қулупнайнинг дастлабки ҳосиллари аллақачон йиғиб олинган эди.
Эслатиб ўтамиз, 1 май куни президент Шавкат Мирзиёев Тошкент вилоятининг Қибрай туманидаги янги боғ барпо этиладиган жойда бўлиб, дастлабки дарахтларни экиш жараёнида қатнашган эди. Давлат раҳбари янги боғда дарахтларни улкан дарахтнинг беш новдаси шаклида экишни таклиф қилган эди — бу Ўзбекистонни ривожлантириш бўйича Ҳаракатлар стратегиясининг бешта устувор йўналишини рамзий маънода англатади. Бу ерда Ўзбекистон мустақиллигининг 30 йиллигига бағишланган «Истиқлол» мажмуаси ҳам бунёд этилади.
Изоҳ (0)