O‘zbekiston Prezidentining 19-may kuni qabul qilgan xorijiy tillarni o‘rganishni ommalashtirish tizimini takomillashtirish bo‘yicha qarori bilan Vazirlar Mahkamasi huzurida Xorijiy tillarni o‘rganishni ommalashtirish agentligi tashkil etildi. Shu kuni hukumat tomonidan qabul qilingan qaror bilan agentlikka direktor o‘rinbosarlari tayinlandi.
Qarorga ko‘ra, Azimjon Xusanov va Sanjar Obidov Vazirlar Mahkamasi huzuridagi Xorijiy tillarni o‘rganishni ommalashtirish agentligi direktorining o‘rinbosarlari etib tayinlandi.
Eslatib o‘tamiz, O‘zbekistonda Xorijiy tillarni o‘rganishni ommalashtirish agentligi tashkil etilishi haqida 6-may kuni Shavkat Mirziyoyev raisligida o‘tkazilgan yig‘ilishda ma’lum qilingandi. “Agentlik, eng avvalo, dunyoda samarali natija bergan o‘qitish metodikalari, dastur va darsliklarini bog‘cha, maktab, litsey, oliygoh va o‘quv markazlarida joriy etib, xorijiy tillarni mukammal o‘zlashtirishga ko‘maklashadi”, — degan edi Prezident.
Ushbu yig‘ilishda davlat rahbari oliygohlardagi 78 foiz professor-o‘qituvchilarning chet tilini bilish darajasi qoniqarsiz ahvolda ekanini tanqid qilib, ta’lim muassasalari bitiruvchilari kamida 2 ta chet tilini mukammal bilishi shartligini ta’kidlagandi.
Izoh (0)