O‘zbekistonlik migrantlar Rossiyadan chiqib ketishi uchun 28-may kuni qo‘shimcha poyezd yo‘lga qo‘yiladi. Bu haqda “Rossiya temiryo‘llari”ga qarashli Privoljsk temiryo‘li matbuot xizmati xabar berdi.
Unda aytilishicha, O‘zbekiston fuqarolarini Rossiya hududidan olib chiqib ketishi uchun Voljskiy—Toshkent yo‘nalishi bo‘yicha 483/484-sonli poyezdning qo‘shimcha reysi yo‘lga qo‘yiladi. U Voljskiy stansiyasidan 28-may kuni Moskva vaqti bilan soat 20:50 da jo‘naydi.
Chiptalar sotuvda bo‘lib, uni Rossiyadagi istalgan temiryo‘l kassalariga murojaat qilish va O‘zbekiston fuqaroligini tasdiqlovchi hujjatni taqdim etish orqali xarid qilish mumkin. Chiptalarni, shuningdek, “Rossiya temiryo‘llari”ning rasmiy saytida hamda “Rossiya temiryo‘llari yo‘lovchilar uchun” mobil ilovasi orqali ham rasmiylashtirish mumkin.
Rossiya hududida poyezd qo‘shimcha to‘xtashlarsiz harakatlanadi.
O‘zbekiston fuqarolarini olib chiqib ketish Rossiya va O‘zbekiston hukumatlari o‘rtasida amaldagi xalqaro shartnomalar doirasida amalga oshirilmoqda.
Eslatib o‘tamiz, aprel o‘rtalarida Rossiya Ichki ishlar vazirligi mamlakatdagi O‘zbekiston hamda boshqa MDH davlatlaridan kelgan noqonuniy migrantlardan 15-iyunga qadar mamlakatni tark etishni talab qilgandi. Aprel oyining oxirlarida esa Moskvaga ishlash uchun borgan 500 dan ortiq o‘zbekistonlik 2 oydan buyon karantindaligi sabab norozilik bildirgandi.
Izoh (0)