Ўзбекистонлик мигрантлар Россиядан чиқиб кетиши учун 28 май куни қўшимча поезд йўлга қўйилади. Бу ҳақда «Россия темир йўллари»га қарашли Приволжск темир йўли матбуот хизмати хабар берди.
Унда айтилишича, Ўзбекистон фуқароларини Россия ҳудудидан олиб чиқиб кетиши учун Волжский—Тошкент йўналиши бўйича 483/484-сонли поезднинг қўшимча рейси йўлга қўйилади. У Волжский станциясидан 28 май куни Москва вақти билан соат 20:50 да жўнайди.
Чипталар сотувда бўлиб, уни Россиядаги исталган темир йўл кассаларига мурожаат қилиш ва Ўзбекистон фуқаролигини тасдиқловчи ҳужжатни тақдим этиш орқали харид қилиш мумкин. Чипталарни, шунингдек, «Россия темир йўллари»нинг расмий сайтида ҳамда «Россия темир йўллари йўловчилар учун» мобил иловаси орқали ҳам расмийлаштириш мумкин.
Россия ҳудудида поезд қўшимча тўхташларсиз ҳаракатланади.
Ўзбекистон фуқароларини олиб чиқиб кетиш Россия ва Ўзбекистон ҳукуматлари ўртасида амалдаги халқаро шартномалар доирасида амалга оширилмоқда.
Эслатиб ўтамиз, апрель ўрталарида Россия Ички ишлар вазирлиги мамлакатдаги Ўзбекистон ҳамда бошқа МДҲ давлатларидан келган ноқонуний мигрантлардан 15 июнга қадар мамлакатни тарк этишни талаб қилганди. Апрель ойининг охирларида эса Москвага ишлаш учун борган 500 дан ортиқ ўзбекистонлик 2 ойдан буён карантиндалиги сабаб норозилик билдирганди.
Изоҳ (0)