Koronavirusga qarshi vaksina olishdan oldin va keyin qancha muddat homiladorlikdan saqlanish kerakligi haqida savol berildi. Savolga akusher-ginekolog Barno Islomova javob berdi.
“Umuman koronavirusga qarshi vaksinani 18 yoshdan kichik va homilador ayollarga qo‘llash taqiqlanadi. Hatto vaksinaning qadog‘ida homilador ayollarga qarshi ko‘rsatmalar yozilmagan bo‘lsa ham.
Negaki, klinik tadqiqotlar davomida homilador ayollarga vaksinaning ta’sir darajasi o‘rganilmagan. Shu sababli homilaga ziyon yetkazishi yoki yetkazmasligi to‘g‘risida aniq bir fikr aytish qiyin. Vaksina olishdan avval homiladorlikka gumon bo‘lganda, kerakli tekshiruvlardan o‘tishlari va aniq tashxis qo‘yilishi zarur.
Demak, ayol oxirgi vaksina bilan emlangandan so‘ng 3 oydan to 6 oy muddatgacha homiladorlikni rejalashtirmasligi tavsiya etiladi. Negaki, vaksina olingach, organizmda COVID-19’ga qarshi antitanachalar paydo bo‘lishi uchun vaqt kerak.
Homilador bo‘lish uchun har bir ayol alohida tayyorgarlik ko‘rsa, maqsadga muvofiq bo‘lardi. Xuddi shunday, koronavirusdan vaksina bilan himoyalanishdan tashqari kam qonlik (anemiya) hamda TORCh infeksiyasi uchun ham tahlil sinamasini topshirishlarini maslahat bergan bo‘lardim. Aynan ushbu tekshiruv orqali homilaga ta’sir etuvchi infeksiya bor yoki yo‘qligiga aniqlik kiritiladi”, — deydi Barno Islomova.
Mavzuga doir:
- Koronavirusga qarshi 1-doza vaksinalarini olganlarda kuzatilgan nojo‘ya ta’sirlar 2-bosqichda ham kuzatilishi mumkinmi? Mutaxassis javob berdi
- Nima uchun koronavirusdan keyin soch to‘kiladi? Mutaxassis javob beradi
- Chet elga ketayotgan O‘zbekiston fuqarolaridan emlanish talab etiladimi? Mutaxassis javob berdi
Izoh (0)