Rossiyaning Penza shahrida baxtsiz hodisaga uchragan o‘zbekistonlik ona va bolaga yordam ko‘rsatildi. Bu haqda Tashqi mehnat migratsiyasi agentligi xabar berdi.
Ma’lum qilinishicha, 2021-yilning 28-fevralida Penzada andijonlik fuqaro M.B 3 yoshli farzandi qarovsiz qolmasligi uchun ishxonasiga birga olib borgan. Shu kuni uning ishxonasida gaz balloni portlashi oqibatida ona-bola turli darajadagi kuyish jarohatlari olib, shifoxonaga yotqizilgan.
Fuqaroning yaqinlari Tashqi mehnat migratsiyasi agentligiga yordam so‘rab murojaat qilgan.
Agentlik tomonidan zarur chora-tadbirlar ko‘rilishi natijasida ish beruvchidan 150 ming rubl miqdorida kompensatsiya undirib berildi, oilaviy ahvoli inobatga olinib, Andijon viloyati hokimiyati tomonidan 15 million so‘m moddiy yordam puli ajratildi. Shuningdek, tibbiy xizmat sifatini yaxshilash maqsadida O‘zbekistonning Rossiyadagi Bosh konsulxonasi bilan birgalikda Penza viloyati gubernatori bilan muzokaralar olib borilib, fuqaro 17-mart kuni maxsus vertolyot yordamida Nijniy Novgorod shahridagi kuyish markaziga ko‘chirilgan.
Fuqaroga yetkazilgan zararni sug‘urta kompaniyasi va ish beruvchidan undirish maqsadida “Pravovoy sovetnik” MChJdan advokat yollanib, huquqiy choralar ko‘rilmoqda.
Agentlik xabarida aytilishicha, M.B.ning farzandi salomatligi barqarorlashgani sababli 18-may kuni Xalqaro migratsiya tashkiloti bilan hamkorlikda yaqin qarindoshi hamrohligida O‘zbekistonga qaytarildi. M.B.ning o‘zi esa homiylar ko‘magida Nijniy Novgorod shahridagi maxsus shifoxonada davolanmoqda.
Avvalroq Turkiyaning Istanbul, Rossiyaning Novosibirsk va Qozon shaharlarida ishlash maqsadida borib, pandemiya sharoitida moliyaviy qiyin ahvolda qolgan jami 7 nafar fuqaro O‘zbekistonga qaytarilgandi. Undan avval esa Rossiyada qiyin ahvolda qolgan 9 nafar, Istanbuldan esa 6 nafar o‘zbekistonlik vatanga qaytarilgandi.
Izoh (0)