O‘zbekistonda koronavirusga qarshi foydalanilayotgan u yoki bu vaksinani yaxshi yoki yomon deb aytish juda qiyin. Bu haqda sog‘liqni saqlash vaziri o‘rinbosari — Sanitariya-epidemiologik osoyishtalik va jamoat salomatligi xizmati boshlig‘i, bosh davlat sanitariya vrachi Bahodir Yusupaliyev aytdi, deb xabar bermoqda “Podrobno.uz”.
“Vaksinaning samaradorligi emlashdan so‘ng odamda u yoki bu kasallik bilan, ayni holatda koronavirus bilan kasallanmaslik imkonini beruvchi yaxshi immunitet paydo bo‘lishida namoyon bo‘ladi. Hozir bu immunitet shakllangani va u qancha vaqt davomida ishlashi haqida gapirish qiyin”, — degan u 18-may, million dozadan iborat o‘zbek—xitoy vaksinasining uchinchi partiyasi olib kelingan kun.
Uning so‘zlariga ko‘ra, u yoki bu vaksinani yaxshi yoki yomon deb aytish juda qiyin, chunki ushbu preparatlarni ishlab chiqarish muayyan vaqt talab qiladi. Bu bir yil emas, ikki, uch, to‘rt, ayrim hollarda 10 yil bo‘lishi mumkin. Shunga ko‘ra, u yoki bu vaksinaning samaradorligi haqida aytish uchun ma’lum bir vaqt kerak.
“Shunga qaramay, o‘tkazilgan tadqiqotlar O‘zbekistonda qo‘llanilayotgan uchala vaksina ham samarali ekanligi va aholida kerakli immunitetni shakllantirishini ko‘rsatmoqda”, — deb ta’kidlagan u.
Bahodir Yusupaliyev, shuningdek, rasmiylarning samarali harakatlari tufayli bugungi kunda o‘zbekistonliklarda istalgan vaksinani — Hindistonda ishlab chiqarilgan AstraZeneca (ikki dozada), o‘zbek—xitoy ZF-UZ-VAC2001 (uch dozada) va Rossiyaning “Sputnik V” (ikki dozada) vaksinasini tanlash imkoniyati borligini qo‘shimcha qilgan.
Eslatib o‘tamiz, O‘zbekistonda koronavirus infeksiyasiga qarshi ommaviy emlash tadbirlari 1-apreldan boshlandi. Emlash ixtiyoriy va bepul, vaksina olishdan bosh tortganlarga hech qanday chora ko‘rilmaydi. Mamlakatda iyun oyi oxirigacha 4 million kishini koronavirusga qarshi emlash rejalashtirilgan.
Sog‘liqni saqlash vazirligi ma’lumotlariga ko‘ra, 18-mayga kelib O‘zbekistonda koronavirusga qarshi 1 412 312 doza vaksinadan foydalanildi, ularning 286 317 dozasi ikkinchi bosqichda qo‘llanilgan. Shunga ko‘ra, mamlakatda jami emlanganlar soni 1 125 995 kishini tashkil etmoqda.
Bahodir Yusupaliyevning o‘zi 3-may kuni o‘zbek—xitoy ZF-UZ-VAC2001 vaksinasi bilan emlangan.
Izoh (0)