Yaponiyaning Sharp kompaniyasi dunyoda birinchi bo‘lib bir dyuymli sensor va 20 megapikselli kameraga ega model — Auqos R6 smartfonini taqdim etdi, deb xabar beradi Hi-Tech.Mail.ru.
Oldinlari bu kabi bir dyuymli modullar faqatgina “sovundon” deb ataluvchi ixcham kameralarda bo‘lgan. Endilikda uni oddiy o‘lchamli smartfonga joylashtirishga muvaffaq bo‘lindi — u qalinligi bo‘yicha zamonaviy smartfonlardan keskin farq qilmaydi. Matritsa o‘lchami bo‘yicha bundan avvalgi rekord Xiaomi Mi 11 Ultra’ga tegishli edi — uning asosiy kamerasi sensori 1/1,12.
Matritsa o‘lchami — kameraning asosiy ko‘rsatkichlaridan biri hisoblanadi. Matritsaga qancha yorug‘lik tushishi va yaxshi yoritilmagan sharoitda qanday suratlar olishi shunga bog‘liq. Smartfonlar anchadan buyon kunduzgi holatda yaxshi suratga olishni o‘rganib olgan, biroq qorong‘ilikda “katta” kameralardan ancha orqada. Bu qisman dasturiy ta’minot va algoritmlar bilan qoplanib ketadi, ammo katta sensor yordamida uni kompensatsiya qilish oson.
Bir dyuymli sensorga ega kamera yaratishga Germaniyada premium kameralarni ishlab chiqarish bilan shug‘ullanuvchi Leica kompaniyasi yordam bergan. Shu bilan birga, smartfonning bir necha obyektivlarga ega zamonaviy modellardan farqli o‘laroq, boshqa kamerasi yo‘q. Qo‘shimcha modullar qatoridan chuqurlikni o‘lchovchi datchigi mavjud.
Auqos R6’ning yana bir o‘ziga xosligi — bu uning displeyi. Unga yangilanish chastotasi 1 gertsdan 240 gertsgacha bo‘lgan va eng yuqori yorqinligi 2000 nitga teng Pro IGZO OLED nomli yangi avlod matritsasi o‘rnatilgan.
Qolgan jihatlari bilan qurilma 2021-yil flagmanlaridan farq qilmaydi. U Snapdragon 888 protsessorida, 12 gigabayt tezkor va 128 gigabayt ichki xotirada ishlaydi, shuningdek, akkumulyator sig‘imi 5000 mA/soatni tashkil etadi.
Sharp hozircha yangi modelining narxini e’lon qilmadi va u faqatgina Yaponiyada sotuvga chiqadi.
Izoh (0)