Sharp компанияси энг катта камерага эга смартфонни тақдим этди

Япониянинг Sharp компанияси дунёда биринчи бўлиб бир дюймли сенсор ва 20 мегапикселли камерага эга модель — Auqos R6 смартфонини тақдим этди, деб хабар беради Hi-Tech.Mail.ru.

Олдинлари бу каби бир дюймли модуллар фақатгина «совундон» деб аталувчи ихчам камераларда бўлган. Эндиликда уни оддий ўлчамли смартфонга жойлаштиришга муваффақ бўлинди — у қалинлиги бўйича замонавий смартфонлардан кескин фарқ қилмайди. Матрица ўлчами бўйича бундан аввалги рекорд Xiaomi Mi 11 Ultra’га тегишли эди — унинг асосий камераси сенсори 1/1,12.

Матрица ўлчами — камеранинг асосий кўрсаткичларидан бири ҳисобланади. Матрицага қанча ёруғлик тушиши ва яхши ёритилмаган шароитда қандай суратлар олиши шунга боғлиқ. Смартфонлар анчадан буён кундузги ҳолатда яхши суратга олишни ўрганиб олган, бироқ қоронғиликда «катта» камералардан анча орқада. Бу қисман дастурий таъминот ва алгоритмлар билан қопланиб кетади, аммо катта сенсор ёрдамида уни компенсация қилиш осон.

Бир дюймли сенсорга эга камера яратишга Германияда премиум камераларни ишлаб чиқариш билан шуғулланувчи Leica компанияси ёрдам берган. Шу билан бирга, смартфоннинг бир неча объективларга эга замонавий моделлардан фарқли ўлароқ, бошқа камераси йўқ. Қўшимча модуллар қаторидан чуқурликни ўлчовчи датчиги мавжуд.

Auqos R6’нинг яна бир ўзига хослиги — бу унинг дисплейи. Унга янгиланиш частотаси 1 герцдан 240 герцгача бўлган ва энг юқори ёрқинлиги 2000 нитга тенг Pro IGZO OLED номли янги авлод матрицаси ўрнатилган.

Қолган жиҳатлари билан қурилма 2021 йил флагманларидан фарқ қилмайди. У Snapdragon 888 процессорида, 12 гигабайт тезкор ва 128 гигабайт ички хотирада ишлайди, шунингдек, аккумулятор сиғими 5000 мА/соатни ташкил этади.

Sharp ҳозирча янги моделининг нархини эълон қилмади ва у фақатгина Японияда сотувга чиқади.