Asus kompaniyasi bir kristalli Qualcomm Snapdragon 888 tizimi va Android 11 operatsion tizimida ishlaydigan Zenfone 8 flagmanini taqdim etdi, deb xabar beradi IXBT.
Smartfon 2400x1080 pikselli 5,9 dyuymga teng Samsung E4 AMOLED ekraniga ega bo‘lgan — tomonlar nisbati 20:9 bo‘lgan displey qurilmaning old panelini 90 foizdan ortiq qismini egallagan. 90 gertsli ekranga ega Zenfone 8 Flip’dan farqli o‘laroq, smartfon 120 gertsli yangilanish chastotasi va 240 gertsli sensor so‘rovi qatlami bilan jihozlangan. Ekran DCI-P3 rangli makonining 112 foizini, sRGB ranglar makonining 151,9 fozini egallaydi, o‘rtacha yorqinligi 800, eng yuqori yorqinligi esa 1100 nitni tashkil etadi. Displey Corning Gorilla Glass Victus shishasi bilan himoyalangan, barmoq izi skaneri ekran yuzasi ostiga joylashtirilgan.
Asus Zenfone 8 modeli 6/128, 8/128/ 8/256 hamda 16/256 versiyalarda taqdim etiladi. Flesh-karta o‘qimaydi, biroq tashqi tashuvchilar uchun NFTS ko‘zda tutilgan.
Asosiy kamera sifatida F/1,7 diafragmali 64 megapiksellga teng Sony IMX686’dan foydalanilgan. Ushbu kamera 8K sifatdagi videolarni yozib olish imkonini beradi. Ikkinchi modul keng burchakli obyektivga ega 12 megapikselli sensor 4K sifatli videoni yozishga qodir. Frontal kamerada esa birinchi bor 12 megapikselli Sony IMX663 sensori qo‘llanilgan.
Smartfon ovoz kuchaytiruvchi ikkita Cirrus Logic CS35L45 dinamiklari, shuningdek, shovqin so‘ndirish texnologiyasi bilan jihozlangan. Himoya darajasi IP68 standartiga mos keladi, akkumulyator sig‘imi 4000 mA/soat va 30 vattli tezkor quvvatlanish funksiyasi mavjud.
O‘lchami 148x68,5x8,9 millimetr bo‘lgan smartfon narxi 599 yevrodan boshlanadi.
Izoh (0)