Prezident Shavkat Mirziyoyev 14-may kuni Toshkentdagi Respublika ixtisoslashtirilgan onkologiya va radiologiya ilmiy-amaliy tibbiyot markaziga tashrifi vaqtida shu yerda davolanayotgan asakalik Roziyaxon Bozorboyeva bilan suhbatlashgan edi. “O‘zbekiston 24”ning xabar berishicha, qizaloq shu kunning o‘zida Andijon davlat tibbiyot institutiga o‘qishga qabul qilingan.
Roziyaxonning onasi Dilfuza Xolmatova prezident bilan suhbat vaqtida qizi 2020-yil noyabrida davolanish uchun bu yerga olib kelinganidan so‘ng ahvoli yaxshilanganini ta’kidlab, tibbiyot markazida yaratilgan sharoitlar va shifokorlarning g‘amxo‘rligi uchun minnatdorlik bildirgan. Qayd etishlaricha, qiz shu vaqtgacha uch marta kimyo terapiya olgan, jarrohlik amaliyotini boshdan o‘tkazgan, hozirda nur terapiyasini olyapti.
Shavkat Mirziyoyev qizaloqqa dalda berib: “Ona qizim, yaxshi bo‘lib ketasiz hali. Xudo xohlasa, yaxshi bo‘lib, Asakaga borganingizda, menga xatlar yozasiz”, deganida, ona Roziyaxon uni davolayotgan shifokorlarga havas qilib, bu yil Andijon davlat tibbiyot institutiga o‘qishga kirish uchun harakat qilayotganini aytgan. Bunga javoban prezident: “Andijon tibbiyot institutiga kirdi. Mening hisobimdan bugun kirdi. Prezident hisobidan. O‘zim Yangi norma beraman. O‘qishga kirib, yaxshi o‘qib, bundan ham zo‘r shifokor bo‘lasiz. Tushunarlimi, qizim?”, — degan.
Roziyaxonnnig ta’kidlashicha, u bundan juda xursand bo‘lgan; u bu kunni eng ulug‘, eng yaxshi kun deb hisoblaydi. U bo‘lgan voqeaga hali ham ishona olmayotganini ta’kidlasa-da, endi kasallikka qarshi kurashib, “yaxshi bo‘lishga” va’da bermoqda. Dilfuza Xolmatovaning aytishicha, prezident uning qizi uchun “juda katta ish qildi”. “Kecha Andijon tibbiyot institutiga qabul qilindi. Kecha shu va’dani bergandilar, darrov Andijon viloyati hokimi, institut rektori telefon qildi. Katta rahmat, ularga”, — deydi ona.
Dilfuza Xolmatovaning qo‘shimcha qilishicha, u mazkur uchrashuvgacha prezidentni boshqacha tasavvur qilgan. “Poshshoimizni ko‘rgan kunimiz bo‘ldi bugun. Televizorda ko‘rardik, lekin hayotda... boshqacha tasavvur qilardik, boshqacha odam ekanlar. Samimiy, oddiy, bilmadim, tasvirlab berolmayman. Nurli odam ekan juda ham. Nur keldi, ishonch keldi. Bizning boshimizga soyabon keldi. Juda ham xursandman. Juda ham. So‘z bilan yetkazib berolmaymiz-da, bu narsani. Katta rahmat!”, — dedi Roziyaxonning onasi.
Izoh (0)