Prezident Shavkat Mirziyoyev 14-may kuni Toshkent shahridagi Respublika ixtisoslashtirilgan onkologiya va radiologiya ilmiy-amaliy tibbiyot markazida bo‘lib, u yerda davolanayotgan bolalar bilan suhbatlashgan, ularning ota-onalariga dalda bergani haqida avval xabar qilingan edi. “O‘zbekiston 24” va Zo‘r TV telekanallari ma’lumotlariga ko‘ra, ushbu uchrashuvlardan so‘ng bir qator bolalar Prezident maktabiga qabul qilinishi bildirilgan.
Jumladan, o‘zini “O‘zbekistonda hayitlikning eng kattasini olgan odam” deb hisoblayotgan Rahmonberdi Abdusattorovning qizi Rayhona ham Prezident maktabiga o‘qishga olinishi ma’lum qilingan. Bu haqda “O‘zbekiston 24” telekanali xabar berdi.
“Qizim Rayhonaning oyog‘iga endoprotez qo‘yish uchun chet davlatga order berishdi. Ikkinchisi, ko‘pdan beri orzumiz bo‘lgan, lekin yetti uxlab tushimizga ham kirmagan ish — Samarqand viloyatidan uch xonali uy berishdi. Davolash uchun ko‘p narsalardan kechgandim, uysizlik ham juda qiynab qo‘ygandi. Hozir ham qiynalib, ijarada turgandik — prezidentimiz rahnamoligi ostida juda katta yordam berishdi. Qizim Prezident maktabiga o‘qishga qo‘yildi. Juda xursandman, bu men uchun juda katta quvonch. Otaga bundan ortiq baxt bo‘lmasa kerak”, — deydi Rahmonberdi Abdusattorov.Bundan tashqari, tibbiyot markazida davolanayotgan qizaloqlardan biri Zo‘r TV’ga bergan intervyusida Shavkat Mirziyoyev bilan suhbat vaqtida unga o‘z orzularini aytgani, unga bu orzularini ro‘yobga chiqarish uchun yordam ko‘rsatilishi va’da qilinganini ta’kidlab o‘tgan.
“Prezident bilan uchrashuvda orzumni aytdim. Orzum — tuzalib ketib, Prezident maktabiga o‘qishga kirish edi. Xudo xohlasa, Prezident maktabiga o‘qishga olamiz, deyishdi”, — deydi qizaloq.
Mavzuga doir: Prezident Mirziyoyevni yig‘latgan Sabrina
Izoh (0)