Ijtimoiy tarmoqlarda Samarqand viloyatining Kattaqo‘rg‘on tumanida joylashgan Alisher Navoiy haykaliga tupurgan yigit uning oyog‘ini kiyimlari bilan tozalagani aks etgan video tarqaldi.
Avvalroq Kattaqo‘rg‘on bog‘ida joylashgan Alisher Navoiy haykali oldida nojo‘ya harakat sodir etgani aks etgan video tarqalgandi. Videoda yigit haykalga tupurganini ko‘rish mumkin. Viloyat ichki ishlar boshqarmasining ma’lum qilishicha, ushbu istirohat bog‘ida nojo‘ya xatti-harakat qilgan va uni tasvirga olgan yigitga Ma’muriy javobgarlik to‘g‘risidagi kodeksning 183-moddasiga (mayda bezorilik) asosan ma’muriy bayonnomalar rasmiylashtirilib, to‘plangan hujjatlar jinoyat ishlari bo‘yicha Kattaqo‘rg‘on shahar sudiga yuborilgan.
Internetda tarqalgan navbatdagi videoda haykalga tupurgan yigit suv bilan uning oyoqlarini artayotgani tasvirlangan. Kadrlardan ko‘rish mumkinki, yigitlardan biri haykal poyiga suv quyib, uni artyapti hamda qilgan ishidan uzr so‘ramoqda. Kadr ortida bir shaxsning buyrug‘i bilan yigit kepkasi hamda ust kiyimi bilan ham haykal oyoqlarini tozalagan.
Eslatib o‘tamiz, 11-may kuni xuddi shu joyda noo‘rin xatti-harakatlar qilgan TikTok foydalanuvchisi 15 sutkaga qamalgani haqida xabar berilgandi. Yigit Alisher Navoiy haykali ustidan kulgani uchun hammadan uzr so‘ragan. Unga viloyat IIB xodimlari Alisher Navoiyning “Hayrat ul-abror” kitobi va Oybekning “Navoiy” asarini sovg‘a qilgandi.
Shuningdek, Buxoroda TikTok uchun drift qilgan haydovchining “Jiguli”si jarima maydoniga joylashtirilgani, samarqandlik ikki yigit TikTok’da layk yig‘ish uchun o‘zini tomdan tashlagani hamda harakatlanayotgan Spark ustiga chiqib olgan yigit videosini TikTok’ka joylashtirganlar jarimaga tortilgani haqida xabar berilgandi.
Izoh (0)