Prezident Shavkat Mirziyoyev 10—12-iyun kunlari Tojikistonga rasmiy tashrif bilan borishi to‘g‘risida xabar berilgandi. Asia-Plus nashrining Tojikiston hukumatidagi manbasiga tayanib yozishicha, O‘zbekiston Prezidenti qo‘shni mamlakatga tashrifi davomida Xo‘jand shahriga ham boradi.
Qayd etilishicha, Xo‘jandga tashrif davomida Shavkat Mirziyoyevga Tojikiston prezidenti Imomali Rahmon hamrohlik qiladi.
Dushanbeda muzokaralar o‘tkazilib, 30 dan ortiq hukumatlararo bitimlar imzolanganidan so‘ng, ikki mamlakat rahbarlari So‘g‘d viloyati ma’muriy markaziga borishi kutilmoqda. Ta’kidlanishicha, Shavkat Mirziyoyev So‘g‘d viloyatining savdo-iqtisodiy salohiyati bilan tanishadi, bir qator sanoat korxonalari va madaniy-tarixiy joylarni ziyorat qiladi.
“So‘g‘d va O‘zbekistonning qo‘shni viloyatlari o‘rtasida aloqalarni o‘rnatish masalalarini viloyat rahbariyati bilan muhokama qilish ham rejalashtirilgan”, — deyiladi xabarda.
Avvalroq Toshkentda savdo-iqtisodiy hamkorlik bo‘yicha O‘zbekiston—Tojikiston hukumatlararo komissiyaning 8-yig‘ilishida ishtirok etish uchun Tojikiston bosh vaziri mamlakatga kelgani, ikki mamlakat o‘rtasidagi savdo hajmi 1 milliard dollarga yetkazilishi to‘g‘risida xabar berilgandi.
Eslatib o‘tamiz, Shavkat Mirziyoyev davlat tashrifi bilan Tojikistonga 2018-yil mart oyida, so‘ng 2018-yilning sentabr oyi oxirida borgandi. Keyinchalik, 2019-yil 14-iyunida Osiyoda o‘zaro hamkorlik va ishonch choralari bo‘yicha konferensiyaning beshinchi sammitida ishtirok etish uchun Tojikistonga borgan.
Izoh (0)