Тошкентдаги онкология марказида даволанаётган қиз Шавкат Мирзиёев билан учрашган куниёқ президент ҳисобидан Андижон тиббиёт институтига ўқишга қабул қилинди

Президент Шавкат Мирзиёев 14 май куни Тошкентдаги Республика ихтисослаштирилган онкология ва радиология илмий-амалий тиббиёт марказига ташрифи вақтида шу ерда даволанаётган асакалик Розияхон Бозорбоева билан суҳбатлашган эди. «Ўзбекистон 24»нинг хабар беришича, қизалоқ шу куннинг ўзида Андижон давлат тиббиёт институтига ўқишга қабул қилинган.

Розияхоннинг онаси Дилфуза Холматова президент билан суҳбат вақтида қизи 2020 йил ноябрида даволаниш учун бу ерга олиб келинганидан сўнг аҳволи яхшиланганини таъкидлаб, тиббиёт марказида яратилган шароитлар ва шифокорларнинг ғамхўрлиги учун миннатдорлик билдирган. Қайд этишларича, қиз шу вақтгача уч марта кимё терапия олган, жарроҳлик амалиётини бошдан ўтказган, ҳозирда нур терапиясини оляпти.

Шавкат Мирзиёев қизалоққа далда бериб: «Она қизим, яхши бўлиб кетасиз ҳали. Худо хоҳласа, яхши бўлиб, Асакага борганингизда, менга хатлар ёзасиз», деганида, она Розияхон уни даволаётган шифокорларга ҳавас қилиб, бу йил Андижон давлат тиббиёт институтига ўқишга кириш учун ҳаракат қилаётганини айтган. Бунга жавобан президент: «Андижон тиббиёт институтига кирди. Менинг ҳисобимдан бугун кирди. Президент ҳисобидан. Ўзим Янги норма бераман. Ўқишга кириб, яхши ўқиб, бундан ҳам зўр шифокор бўласиз. Тушунарлими, қизим?», — деган.

Розияхоннниг таъкидлашича, у бундан жуда хурсанд бўлган; у бу кунни энг улуғ, энг яхши кун деб ҳисоблайди. У бўлган воқеага ҳали ҳам ишона олмаётганини таъкидласа-да, энди касалликка қарши курашиб, «яхши бўлишга» ваъда бермоқда. Дилфуза Холматованинг айтишича, президент унинг қизи учун «жуда катта иш қилди». «Кеча Андижон тиббиёт институтига қабул қилинди. Кеча шу ваъдани бергандилар, дарров Андижон вилояти ҳокими, институт ректори телефон қилди. Катта раҳмат, уларга», — дейди она.

Дилфуза Холматованинг қўшимча қилишича, у мазкур учрашувгача президентни бошқача тасаввур қилган. «Пошшоимизни кўрган кунимиз бўлди бугун. Телевизорда кўрардик, лекин ҳаётда... бошқача тасаввур қилардик, бошқача одам эканлар. Самимий, оддий, билмадим, тасвирлаб беролмайман. Нурли одам экан жуда ҳам. Нур келди, ишонч келди. Бизнинг бошимизга соябон келди. Жуда ҳам хурсандман. Жуда ҳам. Сўз билан етказиб беролмаймиз-да, бу нарсани. Катта раҳмат!», — деди Розияхоннинг онаси.