Ижтимоий тармоқларда Самарқанд вилоятининг Каттақўрғон туманида жойлашган Алишер Навоий ҳайкалига тупурган йигит унинг оёғини кийимлари билан тозалагани акс этган видео тарқалди.
Аввалроқ Каттақўрғон боғида жойлашган Алишер Навоий ҳайкали олдида ножўя ҳаракат содир этгани акс этган видео тарқалганди. Видеода йигит ҳайкалга тупурганини кўриш мумкин. Вилоят ички ишлар бошқармасининг маълум қилишича, ушбу истироҳат боғида ножўя хатти-ҳаракат қилган ва уни тасвирга олган йигитга Маъмурий жавобгарлик тўғрисидаги кодекснинг 183-моддасига (майда безорилик) асосан маъмурий баённомалар расмийлаштирилиб, тўпланган ҳужжатлар жиноят ишлари бўйича Каттақўрғон шаҳар судига юборилган.
Интернетда тарқалган навбатдаги видеода ҳайкалга тупурган йигит сув билан унинг оёқларини артаётгани тасвирланган. Кадрлардан кўриш мумкинки, йигитлардан бири ҳайкал пойига сув қуйиб, уни артяпти ҳамда қилган ишидан узр сўрамоқда. Кадр ортида бир шахснинг буйруғи билан йигит кепкаси ҳамда уст кийими билан ҳам ҳайкал оёқларини тозалаган.
Эслатиб ўтамиз, 11 май куни худди шу жойда ноўрин хатти-ҳаракатлар қилган TikTok фойдаланувчиси 15 суткага қамалгани ҳақида хабар берилганди. Йигит Алишер Навоий ҳайкали устидан кулгани учун ҳаммадан узр сўраган. Унга вилоят ИИБ ходимлари Алишер Навоийнинг «Ҳайрат ул-аброр» китоби ва Ойбекнинг «Навоий» асарини совға қилганди.
Шунингдек, Бухорода TikTok учун дрифт қилган ҳайдовчининг «Жигули»си жарима майдонига жойлаштирилгани, самарқандлик икки йигит TikTok’да лайк йиғиш учун ўзини томдан ташлагани ҳамда ҳаракатланаётган Spark устига чиқиб олган йигит видеосини TikTok’ка жойлаштирганлар жаримага тортилгани ҳақида хабар берилганди.
Изоҳ (0)