Qashqadaryo viloyatining Qamashi tumanida aholining qo‘y-qo‘zilarini bo‘g‘izlab ketgan noma’lum hayvon aholi tomonidan urib o‘ldirilgandi. Viloyat Ekologiya boshqarmasi mazkur xabar yuzasidan o‘rganish natijalarini ma’lum qildi.
Ta’kidlanishicha, Qashqadaryo viloyat Ekologiya va atrof-muhitni muhofaza qilish boshqarmasi vaziyatni o‘rganib chiqqan. O‘rganish davomida boshqarma xodimlari Qamashi tuman “Boburtepa” MFY Pastqol qishlog‘idagi xonadon egalari bilan suhbat olib borgan.
Aniqlanishicha, noma’lum hayvon to‘rtta xonadonning olti bosh qo‘yiga zarar yetkazgan. Shundan so‘ng, aholi tomonidan tuni bilan navbatchilik tashkil qilinib, hayvon 14-may kuni o‘ldirilgan.
Qayd etilishicha, mahalliy aholi tinchini buzib, mol-mulkiga zarar yetkazgan hayvon Chiyabo‘ri yirtqichlar turkumiga kiruvchi itsimonlar oilasiga mansub sut emizuvchi hayvon bo‘lgan. Inspektorlar tomonidan aholiga yana shunday holat qaytarilsa, Ekologiya va atrof-muhitni muhofaza qilish boshqarmasiga murojaat qilish kerakligi tushuntirilgan.
Avvalroq Kasbida yashovchi aholi tuman mas’ullari inkor etgan maxluq hamon ularga zarar yetkazayotganini, mas’ullar buni inkor etishdan nariga o‘tmayotgani, Qashqadaryoda aholining qo‘y va echkilarini bo‘g‘izlab ketayotgani aytilgan noma’lum hayvon odamlar tomonidan urib o‘ldirilgani hamda Namanganda noma’lum maxluqning skeleti topilgani haqida xabar berilgandi.
Izoh (0)