Prezident Shavkat Mirziyoyevdan o‘rnak olgan Qashqadaryo hokimi Zoir Mirzayev ham mas’ullar bilan Qarshi shahridagi Respublika ixtisoslashtirilgan onkologiya va radiologiya ilmiy-amaliy tibbiyot markazida bo‘ldi. Bu haqda “Daryo”ga viloyat hokimining matbuot kotibi Ahror Sodiqov xabar berdi.
Ta’kidlanishicha, viloyat hokimi tashrifi davomida shifokor va bemorlar uchun yaratilgan sharoitlar bilan tanishib, markazda davolanayotgan 86 nafar bemorning holidan xabar olgan. Va ularning har biriga bayram sovg‘asini ulashgan.
“Sizlarning sog‘ayib, oilangiz bag‘riga qaytishingiz hammamiz uchun katta baxt va quvonch. Endi onkologik xastaliklarga shifo istab poytaxtga yoki qo‘shni viloyatlarga borib, sarson bo‘lmaysizlar. Prezidentimiz topshirig‘i bilan viloyatimizga ham 4,7 million dollarlik zamonaviy nur berish uskunasi olib kelindi. Bularning barchasi aholi salomatligi, ularning yaqinlari, o‘g‘il-qizlari, ota-onalari baxti uchun xizmat qiladi”, — degan viloyat rahbari bemorlar bilan suhbatda.
Ahror Sodiqov viloyat rahbarlarining onkologik kasalliklar bilan og‘rigan bemorlar bilan suhbatini shunday tasvirlaydi: “Shifoxonaga borgan hammaning ko‘zida yosh miltilladi. Kinodagi mashhur bolakayni eslatuvchi Samirning kulgusi butun borliqni egalladi. Respublika ixtisoslashtirilgan onkologiya va radiologiya ilmiy-amaliy tibbiyot markazi Qashqadaryo filialiga kirib borar ekanmiz, o‘zimizni xuddiki katta odamlardek his qilib, katta qadamlar bilan kirib bordik. Birdan... sog‘ayib ketishini umid qilib, shifoxona derazalariga boqib turgan g‘amgin ko‘zlar qadamimizni sekinlatdi. Ular bilan gaplashish shart emas — ko‘zi va yuzlaridagi g‘amginlik odamni ezib qo‘yishi aniq edi”.
Izoh (0)