Tibbiyot fanlari doktori Miralisher Islomov Respublika ixtisoslashtirilgan gematologiya ilmiy-amaliy tibbiyot markazi direktori lavozimiga tayinlandi, deb xabar bermoqda Sog‘liqni saqlash vazirligi matbuot xizmati.
Xabarda aytilishicha, u faoliyati davomida Toshkent tibbiyot instituti 1-klinikasi bo‘lim boshlig‘i, ushbu klinikaning Xirurgiya bo‘limi bosh mutaxassisi, davolash ishlari bo‘yicha bosh shifokor o‘rinbosari, bosh shifokori, shuningdek, Akfa Medline klinikasida tibbiyot texnologiyalari bo‘yicha maslahatchi lavozimlarida ishlagan. Bundan tashqari, u Toshkent shahar sog‘liqni saqlash bosh boshqarmasi boshlig‘i vazifasida ham faoliyat yuritgan.
Tayinlovga qadar Qurilish vazirligi bosh ekspertizasi, tibbiyot texnologiyasi bo‘yicha bosh mutaxassis lavozimida ishlab kelgan.
Ma’lumot uchun, Toshkentda Respublika ixtisoslashtirilgan gematologiya ilmiy-amaliy tibbiyot markazi “O‘zbekiston Respublikasida gematologiya va transfuziologiya xizmatlarini rivojlantirish hamda onkogematologik va davolash qiyin bo‘lgan kasalliklarga chalingan shaxslarni yanada qo‘llab-quvvatlash chora-tadbirlari to‘g‘risida” Prezident qarori bilan 2020-yilning fevral oyida tashkil etilgan.
Markaz aholiga gematologik va transfuziologik yordam ko‘rsatish, shunday kasalliklarning oldini olish va ularni davolash, gematologiya sohasida ilmiy izlanishlar olib borishga ixtisoslashgan.
Shavkat Mirziyoyev 14-may kuni ushbu markazga borib, oqqonga chalingan bolalar holidan xabar olgandi.
Izoh (0)