Toshkentda o‘z qizi va nabirasi tomonidan kaltaklangan onaxonga himoya orderi berildi. Bu haqda poytaxt IIBB matbuot xizmati xabar berdi.
Eslatib o‘tamiz, may oyi boshlarida Toshkentda ayol o‘zi qizi bilan birgalikda onasini muntazam ravishda kaltaklab kelgani ma’lum bo‘lgandi. Holat yuzasidan Jinoyat kodeksining 110-moddasi 2-qismi “a” bandi (ojiz ahvoldaligi aybdorga ayon bo‘lgan shaxsni qiynash) bilan jinoyat ishi qo‘zg‘atilgan.
Toshkent shahar IIBB matbuot xizmati xabariga ko‘ra, yaqinda Mirzo Ulug‘bek tumani IIO FMB xotin-qizlar masalalari bo‘yicha inspektorlari ushbu ayol badan shikastlari bilan yotqizilgan tumanidagi xususiy klinikalardan birida bo‘ldi. Davolovchi shifokordan uning ahvoli haqida so‘radi.
Bundan tashqari, 3-son ichki ishlar bo‘limida jabrlanuvchining qizi 57 yoshli Saodat G. va nabirasi 32 yoshli Sevara G. ishtirokida mazkur holat muhokamasi o‘tkazilgan. Muhokama davomida jabrlanuvchining qizi va nabirasi badan shikastlariga aloqadorliklarini inkor etib, qariya ayolning o‘zi bir necha bor yiqilganini aytgan.
Barcha tafsilotlar o‘rganib chiqilgach, keksa ayolga himoya orderi berishga qaror qilindi. Uning qizi va nabirasi esa mazkur hujjat qoidalarini buzish oqibati haqida ogohlantirilgan.
Ayni paytda jinoyat ishi bo‘yicha tergov davom etmoqda.
Izoh (0)