Президент Шавкат Мирзиёевдан ўрнак олган Қашқадарё ҳокими Зоир Мирзаев ҳам масъуллар билан Қарши шаҳридаги Республика ихтисослаштирилган онкология ва радиология илмий-амалий тиббиёт марказида бўлди. Бу ҳақда «Дарё»га вилоят ҳокимининг матбуот котиби Аҳрор Содиқов хабар берди.
Таъкидланишича, вилоят ҳокими ташрифи давомида шифокор ва беморлар учун яратилган шароитлар билан танишиб, марказда даволанаётган 86 нафар беморнинг ҳолидан хабар олган. Ва уларнинг ҳар бирига байрам совғасини улашган.
«Сизларнинг соғайиб, оилангиз бағрига қайтишингиз ҳаммамиз учун катта бахт ва қувонч. Энди онкологик хасталикларга шифо истаб пойтахтга ёки қўшни вилоятларга бориб, сарсон бўлмайсизлар. Президентимиз топшириғи билан вилоятимизга ҳам 4,7 миллион долларлик замонавий нур бериш ускунаси олиб келинди. Буларнинг барчаси аҳоли саломатлиги, уларнинг яқинлари, ўғил-қизлари, ота-оналари бахти учун хизмат қилади», — деган вилоят раҳбари беморлар билан суҳбатда.
Аҳрор Содиқов вилоят раҳбарларининг онкологик касалликлар билан оғриган беморлар билан суҳбатини шундай тасвирлайди: «Шифохонага борган ҳамманинг кўзида ёш милтиллади. Кинодаги машҳур болакайни эслатувчи Самирнинг кулгуси бутун борлиқни эгаллади. Республика ихтисослаштирилган онкология ва радиология илмий-амалий тиббиёт маркази Қашқадарё филиалига кириб борар эканмиз, ўзимизни худдики катта одамлардек ҳис қилиб, катта қадамлар билан кириб бордик. Бирдан... соғайиб кетишини умид қилиб, шифохона деразаларига боқиб турган ғамгин кўзлар қадамимизни секинлатди. Улар билан гаплашиш шарт эмас — кўзи ва юзларидаги ғамгинлик одамни эзиб қўйиши аниқ эди».
Изоҳ (0)