Qashqadaryo viloyatining Dehqonobod tumanida 2021-yilning 16-may kuni bo‘lib o‘tgan Xalq deputatlari tuman kengashi deputatligiga o‘tkazilgan saylov haqqoniy emas deb topilgan. Bu haqda “Daryo”ga xabar bergan tuman hokimligi axborot xizmatining ma’lumot berishicha, saylovdagi noqonuniy holat hokimlik tomonidan aniqlangach, tuman saylov komissiyasi hokimlik axborot xizmati ma’lumotini inobatga olib, saylovni o‘tkazilmagan deb qaror qabul qilgan.
“O‘zbekiston Respublikasi Saylov kodeksining 96-moddasiga ko‘ra, saylov agar unda saylovchilar ro‘yxatiga kiritilgan saylovchilarning o‘ttiz uch foizidan kami ishtirok etgan bo‘lsa, o‘tmagan deb topiladi. Tuman saylov komissiyasi shuni va tuman hokimligi taqdim etgan axborotni inobatga olib, o‘tkazilgan saylovni bekor qildi va saylov o‘tkazilmagan deb hisobladi”, — deydi tuman saylov komissiyasi kotibi Renat Qo‘ziboyev.
“Jamoatchilikka shuni ma’lum qilamizki, holat tuman hokimligi axborot xizmati tomonidan aniqlanib, bunga o‘sha paytning o‘zida munosabat bildirilgan va holatga tuman saylov komissiyasi e’tibori qaratilib, saylovning shaffof va haqqoniy o‘tishini ta’minlash uchun o‘z vaqtida chora-tadbirlar belgilangan”, — deydi tuman hokimligi axborot xizmati mas’uli.
Eslatib o‘tamiz, avvalroq 16-may, yakshanba kuni Xalq deputatlari Dehqonobod tuman kengashining bo‘shab qolgan 29-Bo‘ston saylov okrugi deputatligiga saylov bo‘lib o‘tgani, unda 85-maktab va tibbiyot kollejidagi saylov uchastkasida saylovchilarga bir nechta byulleten berilgani va bir saylovchi 15—20 talab ovoz berishga uringan holati kuzatilgani hamda saylovchilar fuqarolik pasportlarisiz ovoz berishga uringani ma’lum qilingandi.
Izoh (0)