Buxoro viloyat IIB YHXB xodimlari tomonidan qarzdorligi sabab yashirinishga uringan va avtomobilining davlat raqam belgisini boshqa avtomashina raqami bilan almashtirib, soxtalashtirgan holda qoidabuzarlik sodir etgan haydovchi aniqlandi. Bu haqda “Daryo”ga viloyat IIB YHXB matbuot guruhi rahbari Ulug‘bek Shukrullayev xabar berdi.
Ta’kidlanishicha, Buxoro viloyatining G‘ijduvon tumanidagi “Sarmijon” yo‘l maskanidan Xorazm—Navoiy yo‘nalishida harakatlanib kelayotgan davlat raqami 90 468 DBA bo‘lgan yuk mashinasining davlat belgisi YPX xodimlarida shubha uyg‘otgan.Viloyat IIB YHXB yo‘l-patrul xizmati otryadi 3-safarbarlik guruhi xodimlari tomonidan mazkur transport vositasi to‘xtatilgan va holat o‘rganilgan.
Haydovchi P.X.ga tegishli bo‘lgan ushbu yuk mashinasi to‘xtatilib tekshirilganda, avtomashinaga o‘rnatilgan davlat raqami boshqa transport vositasiga tegishli bo‘lib chiqqan.
Aniqlanishicha, fuqaro P.X. ilgari ham ko‘plab qoidabuzarliklar sodir etgan va qarzdorligi ko‘p bo‘lgani sabab unga nisbatan yuk avtomashinasining davlat raqam belgisi orqali majburiy ijro byurosi tomonidan qidiruv e’lon qilingan. Shu bois haydovchi aybini yashirib, ishini davom ettirish maqsadida o‘ziga tegishli bo‘lmagan davlat raqam belgisini o‘zining yuk avtomashinasiga o‘rnatgan va yana bir qonun buzilishiga yo‘l qo‘ygan.
Transport vositasi zudlik bilan jarima maydonchasiga olib ketilgan. Haydovchiga nisbatan Ma’muriy javobgarlik to‘g‘risidagi kodeksning 125-moddasi 6-qismi (transport vositalaridan foydalanish qoidalarini buzish)ga asosan, ma’muriy bayonnoma rasmiylashtirilgan.
Izoh (0)