Бухоро вилоят ИИБ ЙҲХБ ходимлари томонидан қарздорлиги сабаб яширинишга уринган ва автомобилининг давлат рақам белгисини бошқа автомашина рақами билан алмаштириб, сохталаштирган ҳолда қоидабузарлик содир этган ҳайдовчи аниқланди. Бу ҳақда «Дарё»га вилоят ИИБ ЙҲХБ матбуот гуруҳи раҳбари Улуғбек Шукруллаев хабар берди.
Таъкидланишича, Бухоро вилоятининг Ғиждувон туманидаги «Сармижон» йўл масканидан Хоразм—Навоий йўналишида ҳаракатланиб келаётган давлат рақами 90 468 DBА бўлган юк машинасининг давлат белгиси ЙПХ ходимларида шубҳа уйғотган.Вилоят ИИБ ЙҲХБ йўл-патруль хизмати отряди 3-сафарбарлик гуруҳи ходимлари томонидан мазкур транспорт воситаси тўхтатилган ва ҳолат ўрганилган.
Ҳайдовчи П.Х.га тегишли бўлган ушбу юк машинаси тўхтатилиб текширилганда, автомашинага ўрнатилган давлат рақами бошқа транспорт воситасига тегишли бўлиб чиққан.
Аниқланишича, фуқаро П.Х. илгари ҳам кўплаб қоидабузарликлар содир этган ва қарздорлиги кўп бўлгани сабаб унга нисбатан юк автомашинасининг давлат рақам белгиси орқали мажбурий ижро бюроси томонидан қидирув эълон қилинган. Шу боис ҳайдовчи айбини яшириб, ишини давом эттириш мақсадида ўзига тегишли бўлмаган давлат рақам белгисини ўзининг юк автомашинасига ўрнатган ва яна бир қонун бузилишига йўл қўйган.
Транспорт воситаси зудлик билан жарима майдончасига олиб кетилган. Ҳайдовчига нисбатан Маъмурий жавобгарлик тўғрисидаги кодекснинг 125-моддаси 6-қисми (транспорт воситаларидан фойдаланиш қоидаларини бузиш)га асосан, маъмурий баённома расмийлаштирилган.
Изоҳ (0)