Ijtimoiy tarmoqlarda Samarqand viloyati Paxtachi tumani IIB YHXB boshlig‘i Maqsud Tog‘ayev harakatlangan xizmat avtomobiliga signal chalgan haydovchining avtomobili jarima maydoniga joylashtirilgani tasvirlangan video tarqaldi.
Videodan ko‘rish mumkinki, Damas haydovchisi yo‘lni to‘sib qo‘ygan Nexia-3 avtomobiliga signal chalgan. Shu vaqt uning ichidan tuman YHXB boshlig‘i tushib kelgan va haydovchidan nimaga signal chalganini so‘ragan. Damas haydovchisi harakatni davom ettirish uchun chiqib ketishi kerakligini aytganida, YHXB boshlig‘i o‘z haydovchisiga uni “jarima maydoniga bervorish”ni buyurgan.
Ma’lum qilinishicha, Damas haydovchisi Ma’muriy javobgarlik to‘g‘risidagi kodeksning 135-moddasi (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) 1-qismi bilan jarima maydoniga joylashtirilgan.
UzNews nashrining viloyat IIB matbuot xizmati rahbari Jahongir Sagdullayevga tayanib yozishicha, haydovchi bilan muomala madaniyati va odob-axloq qoidalari to‘g‘risidagi buyruq talablarini buzgan Paxtachi tumani IIB YHXB boshlig‘i Maqsud Tog‘ayevga nisbatan xizmat tekshiruvi tayinlangan.
“Aminman, ‘Intizom ustavi’ga muvofiq intizomiy jazo chorasi qo‘llaniladi va buni rasman e’lon qilamiz. Har qanday holatda ham xodim fuqarolar bilan ahloq, odob doirasida gaplashishi kerak. Uyalib ketdim”, — deydi viloyat IIB matbuot kotibi.
Avvalroq Toshkent viloyatida o‘zini “Oysha xola” deya tanishtirgan YPX xodimiga xizmat tekshiruvi tayinlangani, Toshkentda YPX inspektori haydovchiga o‘rta barmog‘ini ko‘rsatgani, poytaxtda quvvati tugaganini aytib, ishlamayotgan bodikamera bilan tekshiruv o‘tkazgan YPX xodimiga chora ko‘rilgani hamda Samarqandda YPX inspektorlari fuqaroni kuch ishlatib, xizmat mashinasida olib ketgani aks etgan video bo‘yicha rasmiy izoh berilgani haqida xabar berilgandi.
Izoh (0)