Jons Hopkins universiteti ma’lumotlariga ko‘ra, dunyoda koronavirusga chalinganlar soni 153 577 850 kishiga yetdi. Bu borada doimgidek, AQSh (32,4 million), Hindiston (20,2 million), Braziliya (14,7 million), Fransiya (5,7 million) va Turkiya (4,9 million) yetakchilik qilmoqda. COVID-19 oqibatidagi o‘limlar esa 3 214 522 tani tashkil qilmoqda.

Foto: “Daryo” / Madina Nurman

Turkiya hukumati koronavirus bilan bog‘liq vaziyat tufayli, amaldagi lokdaun shartlarini kuchaytirishga qaror qildi. Yangi choralar 7-may kuni kuchga kiradi.

“7-maydan do‘konlarda, shu jumladan, supermarketlarda, faqat asosiy oziq-ovqat mahsulotlari, gigiyena vositalari, hayvonlar uchun ozuqalar va kosmetika vositalari (parfyumeriya va pardoz vositalaridan tashqari) sotilishi mumkin”, — deyiladi mamlakat Ichki ishlar vazirligi xabarida.

Endi spirtli ichimliklarni sotishga qo‘yilgan taqiqqa elektronika vositalari, o‘yinchoqlar, kanselyariya, kiyim-kechak, avtomobil uchun aksessuarlar, idish-tovoq va bog‘dorchilik asboblari ham qo‘shildi.

Mavzuga doir: Turkiyada koronavirus tufayli 17-maygacha to‘liq lokdaun joriy etiladi

Filippin prezidenti Rodrigo Duterte 3-may, dushanba kuni COVID-19’ga qarshi vaksinaning birinchi dozasini oldi.

76 yoshli davlat rahbari Xitoyning Sinopharm kompaniyasi vaksinasi bilan emlangan. “Men emlanishni ko‘pdan beri kutayotgan edim”, — dedi Duterte.

Mavzuga doir: Foto: Internet izlab tog‘ga chiqayotgan o‘quvchilar. Lokdaunda filippinliklar qanday ta’lim olmoqda?

2022-yilda dunyo aholisining voyaga yetgan qismini koronavirusga qarshi emlash uchun Jahon sog‘liqni saqlash tashkilotiga 35 milliard dollardan 45 milliard dollargacha pul kerak bo‘ladi, dedi JSST rahbari Tedros Gebreyesus.

Uning aytishicha, ushbu summa JSST tomonidan pandemiyaga qarshi kurash uchun ishga tushirilgan ACT Accelerator xalqaro dasturini moliyalashtirish uchun zarur bo‘lgan 19 milliard dollarga qo‘shimcha ravishda kerak bo‘ladi.

Mavzuga doir: COVID-19 pandemiyasi bir necha oy ichida nazorat ostiga olinadi — JSST

Ispaniya aholisining deyarli 5 million koronavirusga qarshi to‘liq emlandi. Mamlakat hukumati 4-may kuni ertalabga qadar 5 millionlik marradan o‘tishni ko‘zlagan edi.

Iyunning birinchi haftasigacha yana 5 million kishini, yoz oxirigacha esa 33 million odamni yoki voyaga yetgan aholining 70 foizini emlash maqsad qilingan.

Mavzuga doir: Koronavirus pandemiyasi tezlashdi, Ispaniya sayyohlar uchun ochiladi, COVID-19’ga nisbatan immunitet qancha vaqt saqlanadi? Koronaxabarlar