Ozarbayjonda harbiy mashg‘ulotlar boshlandi, ularda 15 ming nafargacha harbiy xizmatchi qatnashadi, deb yozadi “RBK” mamlakat Mudofaa vazirligiga tayanib.
Manyovrlar 20-maygacha davom etib, 300 tagacha zirhli texnika, 400 ga yaqin raketa-artilleriya qurilmalari, baravariga o‘q otish reaktiv tizimlari, minomyotlar va tankka qarshi vositalar, 50 donagacha harbiy aviatsiya va uchuvchisiz uchar qurilmalarni jalb qiladi.
“Asosiy e’tibor vatan urushida (Boku 2020-yil kuzida Tog‘li Qorabog‘da Yerevan bilan bo‘lgan qurolli nizoni shunday ataydi) to‘plangan harbiy tajribani hisobga olib, qo‘shinlarni boshqarish, jangovar shaylikka keltirish va qayta guruhlashga qaratiladi”, — deya ma’lum qilishdi muassasada. Harbiylar, shuningdek, noqonuniy qurolli guruhlar provokatsiyalarining oldini olish va terrorchilarni zararsizlantirish bo‘yicha kontroperatsiyalar o‘tkazish bo‘yicha vazifalarni ham bajaradi, deya qo‘shimcha qilingan Mudofaa vazirligida.
Ozarbayjon harbiy mashqlar o‘tkazish niyatini 12-may kuni e’lon qildi. O‘sha kuniyoq Armaniston Mudofaa vazirligi Ozarbayjon Qurolli kuchlari “chegaralarni aniqlashtirish bahonasi ostida chegara uchastkalaridan birida muayyan ishlarni amalga oshirishga uringani”ni ma’lum qildi. Armaniston harbiylarining aralashuvidan keyin ishlar to‘xtatildi. 13-may kuni, Yerevanning ta’kidlashicha, Ozarbayjon Qurolli kuchlari Armanistonga nisbatan navbatdagi provokatsiyani amalga oshirib, Vardenisa va Sisiana tumanlarida davlat chegaralariga siljib borishga uringan.
Armaniston bosh vaziri vazifasini bajaruvchi Nikol Pashinyan hodisani mamlakat suverenitetiga tajovuz deb atadi. Uning so‘zlariga ko‘ra, ozarbayjonlik harbiylar Armaniston hududi ichkarisiga 3,5 kilometrgacha siljib borgan va Sevlich ko‘lini o‘rab olishga uringan. Pashinyan, shuningdek, Bokuni mahalliy nizo keltirib chiqarish uchun gijgijlashga urinishda aybladi.
Ozarbayjon Tashqi ishlar vazirligi avvalroq Yerevanning reaksiyasini nomunosib deb hisoblashini, chunki 2020-yil 10-noyabrdagi uch tomonlama bitimga ko‘ra, Ozarbayjonning Armaniston bilan chegarada joylashgan Kelbajar va Lochin tumanlarida Respublika chegara kuchlarini qayta joylashtirish jarayoni bormoqda.
16-may kuni Ozarbayjon Tashqi ishlar vazirligi matbuot kotibi Armaniston suverenitetini buzish haqidagi ayblovlarni asossiz deb atadi. Uning so‘zlariga ko‘ra, so‘nggi oylarda tomonlar o‘rtasida chegara masalalarida ziddiyatlar yuzaga kelgan va ularning barchasi muzokaralar yo‘li bilan tartibga solingan edi. Ozarbayjonning fikricha, Armanistonning provokatsion bayonotlari ushbu mamlakatdagi saylovoldi vaziyat bilan bog‘liq, deya qo‘shib qo‘ydi TIV vakili.
Fransiya prezidenti Emmanuel Makron Ozarbayjonning xatti-harakatlarini tanqid qildi. Facebook’da arman tilida e’lon qilingan postida u Ozarbayjon hukumatini qo‘shinlarini olib ketishga chaqirdi. AQSh davlat departamenti Ozarbayjon harbiylarining Armaniston bilan chegarada siljishini provokatsiya deb atab, uni to‘xtatish kerakligini ta’kidladi.
Izoh (0)