Ramazon hayiti bayrami arafasida Namangan shahrining Yangi Namangan tumanidagi “Bunyodkor” mahallasida yangi guzar foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
Ko‘rkam va zamonaviy uslubda barpo etilgan mahalla guzari fuqarolar yig‘ini idorasi, kutubxona, madaniyat maskani va davlat xizmatlari markazini o‘z ichiga oldi.
Buning uchun 1 milliard so‘m mablag‘ sarflandi.
Bu yerda nafaqat xodimlar, balki fuqarolar uchun ham barcha shart-sharoitlar yaratilgan.
Shuningdek, mahallada 150 o‘ringa mo‘ljallangan maktabgacha ta’lim tashkiloti ham qurib bitkazildi.
Bu mazkur hududda istiqomat qiluvchi ota-onalar uchun eng munosib sovg‘a bo‘ldi.
“Bugungi kungacha mahallamizdagi 14 kilometr ichki yo‘lga shag‘al yotqizildi. 602 ta beton tayanch ustun o‘rnatildi, 13,7 kilometr masofaga elektr energiya tarmog‘i tortildi. Mavjud 21 ta transformatordan 19 tasi ta’mirlandi. 2 mingdan ortiq xonadonni toza ichimlik suvi va tabiiy gaz bilan ta’minlash bo‘yicha amaliy ishlarga kirishildi. 17 mingdan oshiq mevali va manzarali ko‘chatlar o‘tqazildi. Aholi bandligini ta’minlash maqsadida 2 ta kichik sanoat zonasiga asos solindi. Eng asosiysi, qariyb 30 yildan beri aholi uchun muammo bo‘lib kelgan chiqindixona boshqa joyga ko‘chirildi”, — deydi “Bunyodkor” mahalla mahalla fuqarolar yig‘ini raisi Obidxon Dadashev.
Eslatib o‘tamiz, Prezident Shavkat Mirziyoyev 2021-yil 19-fevral kuni Namangan viloyatiga tashrifi chog‘ida “Bunyodkor” mahallasida bo‘lgan va ichimlik suvi yo‘q, ichki yo‘llar yomon, atrof obodonlashtirilmagan hududdagi ahvol uchun shahar hokimi va prokuroriga keskin tanbek bergandi. Shundan so‘ng viloyat hokimi Shavkat Abdurazzoqov ushbu mahallaga ko‘chib kelib yashashini ma’lum qilgan.
Izoh (0)