Shavkat Mirziyoyev 13-may kuni Qirg‘iziston prezidenti Sadir Japarov bilan telefon orqali muloqot qildi.
Prezident matbuot xizmatining xabar berishicha, davlat rahbarlari Ramazon hayiti munosabati bilan bir-birlarini samimiy qutlab, birodar xalqlarga tinchlik, farovonlik va ravnaq tilab, ezgu istaklarini bildirdi.
Qirg‘iziston prezidentining 2021-yil mart oyidagi O‘zbekistonga davlat tashrifi davomida erishilgan kelishuvlar va imzolangan bitimlarni o‘z vaqtida amalga oshirish muhim ekani qayd etildi. Shavkat Mirziyoyev va Sadir Japarov o‘rtasida 30-aprel kuni bo‘lib o‘tgan telefon orqali muloqotda ham mart oyida “Toshkentda qabul qilingan majburiyatlarni so‘zsiz bajarish muhim”ligi qayd etilgandi. Davlat rahbarlari, shuningdek, Tojikiston chegarasidagi vaziyatni tez fursatda hal etishni ham muhokama qilgandi.
13-may kuni bo‘lib o‘tgan suhbat davomida savdo, sanoat, energetika, transport va iqtisodiyotning boshqa tarmoqlarida qo‘shma dastur va loyihalarni ilgari surishga ham alohida e’tibor qaratilgan. Qirg‘iziston-Tojikiston chegarasidagi vaziyatni barqarorlashtirish, shuningdek, Markaziy Osiyo mintaqasida do‘stlik, yaxshi qo‘shnichilik va sheriklik munosabatlarini mustahkamlash bo‘yicha olib borilayotgan ishlar mamnuniyat bilan qayd etilgan.
Bundan avval Shavkat Mirziyoyev va Rajab Toyyib Erdo‘g‘on bir-birini Ramazon hayiti bilan tabriklagani, Yaponiya bosh vaziri Yosixide Suga bilan telefon orqali muloqot qilib, uni O‘zbekistonga taklif qilgani hamda Qozon shahridagi maktabda sodir bo‘lgan fojiali voqea munosabati bilan Shavkat Mirziyoyev Vladimir Putinga hamdardlik bildirgani haqida xabar berilgandi.
Izoh (0)