Рамазон ҳайити байрами арафасида Наманган шаҳрининг Янги Наманган туманидаги «Бунёдкор» маҳалласида янги гузар фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
Кўркам ва замонавий услубда барпо этилган маҳалла гузари фуқаролар йиғини идораси, кутубхона, маданият маскани ва давлат хизматлари марказини ўз ичига олди.
Бунинг учун 1 миллиард сўм маблағ сарфланди.
Бу ерда нафақат ходимлар, балки фуқаролар учун ҳам барча шарт-шароитлар яратилган.
Шунингдек, маҳаллада 150 ўринга мўлжалланган мактабгача таълим ташкилоти ҳам қуриб битказилди.
Бу мазкур ҳудудда истиқомат қилувчи ота-оналар учун энг муносиб совға бўлди.
«Бугунги кунгача маҳалламиздаги 14 километр ички йўлга шағал ётқизилди. 602 та бетон таянч устун ўрнатилди, 13,7 километр масофага электр энергия тармоғи тортилди. Мавжуд 21 та трансформатордан 19 таси таъмирланди. 2 мингдан ортиқ хонадонни тоза ичимлик суви ва табиий газ билан таъминлаш бўйича амалий ишларга киришилди. 17 мингдан ошиқ мевали ва манзарали кўчатлар ўтқазилди. Аҳоли бандлигини таъминлаш мақсадида 2 та кичик саноат зонасига асос солинди. Энг асосийси, қарийб 30 йилдан бери аҳоли учун муаммо бўлиб келган чиқиндихона бошқа жойга кўчирилди», — дейди «Бунёдкор» маҳалла маҳалла фуқаролар йиғини раиси Обидхон Дадашев.
Эслатиб ўтамиз, Президент Шавкат Мирзиёев 2021 йил 19 февраль куни Наманган вилоятига ташрифи чоғида «Бунёдкор» маҳалласида бўлган ва ичимлик суви йўқ, ички йўллар ёмон, атроф ободонлаштирилмаган ҳудуддаги аҳвол учун шаҳар ҳокими ва прокурорига кескин танбек берганди. Шундан сўнг вилоят ҳокими Шавкат Абдураззоқов ушбу маҳаллага кўчиб келиб яшашини маълум қилган.
Изоҳ (0)