AQSh o‘z qo‘shinlarini Afg‘onistondan olib chiqishda harbiy texnikalarining bir qismini yo‘q qiladi

AQSh o‘z qo‘shinlarini Afg‘onistondan olib chiqish jarayonida AQShga qaytarilmaydigan yoki Afg‘oniston milliy mudofaa va xavfsizlik kuchlariga topshirilmaydigan harbiy texnikalarni yo‘q qiladi, deb yozmoqda Associated Press agentligi.

Amerikaga qaytariladiganlarining aksariyati “hech qachon tashlab ketilishi rejalashtirilmagan qimmatbaho uskunalar”, deydi AQSh rasmiylari o‘z ismini oshkor qilmaslik sharti bilan.

Ularning so‘zlariga ko‘ra, vertolyotlar, qurollar va o‘q-dorilar kabi ba’zi boshqa texnikalar Afg‘oniston milliy mudofaa va xavfsizlik kuchlariga topshiriladi. Shuningdek, ularga bir nechta bazalar ham beriladi. Oxirgilaridan biri sifatida Gilmend viloyatidagi yangi “Antonik” bazasi berilgan edi.

Shuningdek, ta’kidlanishicha, yomon holatga kelib qolgani sababli ta’mirlab bo‘lmaydigan uskunalar va transport vositalari yo‘q qilinadi.

Amerika harbiylarining ma’lumotlariga ko‘ra, hozirgacha 1,3 mingta texnika yo‘q qilindi. Afg‘onistondan Amerika harbiylarini olib chiqish muddati tugaguniga qadar (11-sentabrgacha) yanada ko‘proq texnika yo‘q qilinadi, deb aniqlik kiritdi amerikalik amaldor agentlik bilan bo‘lgan suhbatda.

AQSh va uning ittifoqchisi NATO harbiy kuchlari Afg‘onistonni tark eta boshladi. Bu jarayon 2021-yilning 11-sentabr kuni yakunlanishi rejalashtirilgan.

AQShning avvalgi ma’muriyati o‘z qo‘shinlarini Afg‘onistondan 2021-yilning 1-may sanasiga qadar olib chiqishni rejalashtirgan edi.