АҚШ ўз қўшинларини Афғонистондан олиб чиқиш жараёнида АҚШга қайтарилмайдиган ёки Афғонистон миллий мудофаа ва хавфсизлик кучларига топширилмайдиган ҳарбий техникаларни йўқ қилади, деб ёзмоқда Associated Press агентлиги.
Америкага қайтариладиганларининг аксарияти «ҳеч қачон ташлаб кетилиши режалаштирилмаган қимматбаҳо ускуналар», дейди АҚШ расмийлари ўз исмини ошкор қилмаслик шарти билан.
Уларнинг сўзларига кўра, вертолётлар, қуроллар ва ўқ-дорилар каби баъзи бошқа техникалар Афғонистон миллий мудофаа ва хавфсизлик кучларига топширилади. Шунингдек, уларга бир нечта базалар ҳам берилади. Охиргиларидан бири сифатида Гилменд вилоятидаги янги «Антоник» базаси берилган эди.
Шунингдек, таъкидланишича, ёмон ҳолатга келиб қолгани сабабли таъмирлаб бўлмайдиган ускуналар ва транспорт воситалари йўқ қилинади.
Америка ҳарбийларининг маълумотларига кўра, ҳозиргача 1,3 мингта техника йўқ қилинди. Афғонистондан Америка ҳарбийларини олиб чиқиш муддати тугагунига қадар (11 сентябргача) янада кўпроқ техника йўқ қилинади, деб аниқлик киритди америкалик амалдор агентлик билан бўлган суҳбатда.
АҚШ ва унинг иттифоқчиси НАТО ҳарбий кучлари Афғонистонни тарк эта бошлади. Бу жараён 2021 йилнинг 11 сентябрь куни якунланиши режалаштирилган.
АҚШнинг аввалги маъмурияти ўз қўшинларини Афғонистондан 2021 йилнинг 1 май санасига қадар олиб чиқишни режалаштирган эди.
Изоҳ (0)