O‘zbekiston Tashqi ishlar vaziri Abdulaziz Komilov 2021-yilning 11-may kuni Sian shahrida Xitoy Davlat kengashi a’zosi, tashqi ishlar vaziri Van I bilan uchrashdi. Bu haqda vazirlik matbuot xizmati xabar qildi.
Xitoy tashqi ishlar vaziri Xitoy raisi Si Szinpinning O‘zbekiston Prezidenti Shavkat Mirziyoyevga yo‘llagan salomlari va chuqur hurmatini yetkazdi.
Muzokaralar chog‘ida O‘zbekiston va Xitoy o‘rtasidagi har tomonlama strategik sheriklikning hozirgi holati va uni rivojlantirish istiqbollari muhokama qilindi.
Vazirlar oliy darajada erishilgan kelishuvlarni amalga oshirish, turli yo‘nalishdagi o‘zaro munosabatlarni yanada kengaytirish borasidagi ikki davlat yetakchilarining topshiriqlarini bajarish bo‘yicha fikr almashdi.
Tomonlar birgalikdagi sa’y-harakatlar natijasida iqtisodiyot sohasidagi hamkorlikning jadal rivojlanishini ta’minlashga erishilganligini mamnuniyat bilan e’tirof etdi hamda o‘zaro savdo hajmlari va nomenklaturasini yanada oshirishning muhimligini ta’kidladi.
Xitoy—Qirg‘iziston—O‘zbekiston multimodal transport marshrutini rivojlantirish va Xitoy—Qirg‘iziston—O‘zbekiston temiryo‘lini qurish loyihasini birgalikda hayotga tatbiq qilish bo‘yicha tezroq amaliy choralar ko‘rishning dolzarbligi qayd etildi.
Vazirlar xalqaro va mintaqaviy tashkilotlar doirasidagi hamkorlik, mintaqaviy xavfsizlikni ta’minlash, Afg‘onistonda mustahkam tinchlikka erishishga va uning iqtisodiyotini tiklashga ko‘maklashish mexanizmlariga alohida e’tibor qaratdi.
Uchrashuv chog‘ida ikki tomon kun tartibining boshqa masalalari ham muhokama qilindi.
Bundan avval tashqi ishlar vaziri Abdulaziz Komilov may—iyun oylarida Bryusselga borishi kutilayotgani, Abdulaziz Komilov Qirg‘iziston elchixonasiga borib, chegara to‘qnashuvlarida vafot etganlar munosabati bilan hamdardlik bildirgani hamda Abdulaziz Komilov AQSh davlat kotibi bilan telefon orqali suhbatlashib, uni Toshkentga taklif qilgani haqida xabar berilgandi.
Izoh (0)