O‘zbek milliy maqom san’ati markazini Toshkentning Shayxontohur tumanidagi Olmazor ko‘chasida qurish rejalashtirilmoqda. Loyihani amalga oshirishga 93 milliard so‘m (Markaziy bankning 11-maydagi kursiga ko‘ra, 8,8 million dollar)gacha mablag‘ ajratish rejalashtirilmoqda. Bu haqda Davlat xaridlari portalidagi ma’lumotlariga tayanib “Gazeta.uz” xabar berdi.
Madaniyat vazirligi huzuridagi “Yagona buyurtmachi xizmati” injiniring kompaniyasi 16-mart kuni tender e’lon qildi va 15-aprel kuni yakunladi. Tender g‘olibi hozircha ma’lum qilinmagan. Loyiha davlat budjeti mablag‘lari hisobidan moliyalashtiriladi. Uni amalga oshirish muddati 400 kunni tashkil etadi.
Iqtisodiy taraqqiyot va kambag‘allikni qisqartirish vazirligi huzuridagi loyiha va import shartnomalarini kompleks ekspertiza qilish markazining (2020-yil iyuldagi) xulosasida aytilishicha, 93 milliard so‘m — bu loyihaning eng yuqori qiymati.
O‘zbek milliy maqom san’ati markazini davlat muassisi tarzida tashkil etish Prezidentning 2017-yil noyabridagi qarorida ko‘zda tutilgan edi. Uning maqsadi etib o‘zbek maqom san’atini chuqur o‘rganish, u bilan bog‘liq ijro maktablari va an’analarni yangi bosqichda ravnaq toptirish, maqomning “oltin fondi”ni yaratish va boyitish, shuningdek, uni O‘zbekiston va chet elda keng targ‘ib qilish ko‘rsatilgan.
Prezidentning 2020-yilning yanvaridagi qarori bilan, Maqom markazining qurilishi ma’muriy, muhandislik-infratuzilma, suv xo‘jaligi, shuningdek, alohida muhim va toifalangan obyektlarni qurish va rekonstruksiya qilish manzilli dasturiga kiritilgan. Qurilishni amalga oshirish muddati etib 2020−2022-yillar etib belgilangan.
Mavzuga doir: O‘zbekistonda “Maqom” kitob-albomi nashr etildi
Izoh (0)