Qirg‘iziston va Rossiya prezidentlari Sadir Japarov va Vladimir Putin telefon orqali suhbatda qirg‘iz-tojik chegarasidagi mojaroni muhokama qildi. Bu haqda Qirg‘iziston rahbarining matbuot xizmatiga tayanib, “Interfaks” xabar berdi.
Matbuot xizmatining xabariga ko‘ra, prezidentlar may oyi oxirida Japarovning Moskvaga ishchi tashrifi to‘g‘risida kelishib olgan va Putin Rossiya Qirg‘izistonga chegara mojarosining gumanitar oqibatlarini bartaraf etishda zarur yordam ko‘rsatishga tayyorligini ma’lum qilgan.
Moskvada o‘tkazilishi kutilayotgan uchrashuvda rahbarlar mintaqaviy xavfsizlik masalalarini, shu jumladan, Kollektiv xavfsizlik shartnomasi tashkiloti (KXShT), Mustaqil Davlatlar Hamdo‘stligi (MDH) va Shanxay hamkorlik tashkiloti (ShHT) doirasida, shuningdek, COVID-19’ga qarshi kurash va Qirg‘izistonga Rossiya vaksinalarini yetkazib berish haqida muhokamalarni rejalashtirmoqda.
Keyinchalik Kreml matbuot xizmati ham Putin va Japarovning telefon suhbati haqida xabar berdi. “Yaqinda Moskvada Tojikiston prezidenti Emomali Rahmon bilan bo‘lib o‘tgan muzokaralarni inobatga olgan holda, Vladimir Putin Qirg‘iziston–Tojikiston chegara hududidagi vaziyatni siyosiy va diplomatik yo‘llar bilan hal qilish bo‘yicha Bishkek va Dushanbe o‘rtasida erishilgan kelishuvlarni qo‘llab-quvvatlashini bildirdi. Rossiya vaziyatni yanada barqarorlashtirishga hissa qo‘shishga tayyorligi isbotlandi”, — deyiladi xabarda.
Kreml Putin Japarovni Rossiyaga ishchi tashrif bilan kelishga taklif qilgani va taklif qabul qilinganini tasdiqladi.
Avvalroq Vladimir Putin Qirg‘iziston va Tojikiston o‘rtasidagi ziddiyatli vaziyatni hal qilishda vositachi sifatida ishtirok etishga tayyorligini ma’lum qilgandi.
Izoh (0)