Қирғизистон ва Россия президентлари Садир Жапаров ва Владимир Путин телефон орқали суҳбатда қирғиз-тожик чегарасидаги можарони муҳокама қилди. Бу ҳақда Қирғизистон раҳбарининг матбуот хизматига таяниб, «Интерфакс» хабар берди.
Матбуот хизматининг хабарига кўра, президентлар май ойи охирида Жапаровнинг Москвага ишчи ташрифи тўғрисида келишиб олган ва Путин Россия Қирғизистонга чегара можаросининг гуманитар оқибатларини бартараф этишда зарур ёрдам кўрсатишга тайёрлигини маълум қилган.
Москвада ўтказилиши кутилаётган учрашувда раҳбарлар минтақавий хавфсизлик масалаларини, шу жумладан, Коллектив хавфсизлик шартномаси ташкилоти (КХШТ), Мустақил Давлатлар Ҳамдўстлиги (МДҲ) ва Шанхай ҳамкорлик ташкилоти (ШҲТ) доирасида, шунингдек, COVID-19’га қарши кураш ва Қирғизистонга Россия вакциналарини етказиб бериш ҳақида муҳокамаларни режалаштирмоқда.
Кейинчалик Кремль матбуот хизмати ҳам Путин ва Жапаровнинг телефон суҳбати ҳақида хабар берди. «Яқинда Москвада Тожикистон президенти Эмомали Раҳмон билан бўлиб ўтган музокараларни инобатга олган ҳолда, Владимир Путин Қирғизистон–Тожикистон чегара ҳудудидаги вазиятни сиёсий ва дипломатик йўллар билан ҳал қилиш бўйича Бишкек ва Душанбе ўртасида эришилган келишувларни қўллаб-қувватлашини билдирди. Россия вазиятни янада барқарорлаштиришга ҳисса қўшишга тайёрлиги исботланди», — дейилади хабарда.
Кремль Путин Жапаровни Россияга ишчи ташриф билан келишга таклиф қилгани ва таклиф қабул қилинганини тасдиқлади.
Аввалроқ Владимир Путин Қирғизистон ва Тожикистон ўртасидаги зиддиятли вазиятни ҳал қилишда воситачи сифатида иштирок этишга тайёрлигини маълум қилганди.
Изоҳ (0)