Afg‘onistonning Zabul viloyatida mina qo‘yilgan yo‘ldan o‘tayotgan yo‘lovchi avtobusining portlashi oqibatida kamida 16 kishi halok bo‘ldi. Bu haqda OAV ma’lumotlariga tayanib, “Interfaks” xabar berdi.
Shuningdek, TOLOnews telekanali mahalliy hokimiyatga asoslanib, portlashda kamida 11 kishi halok bo‘lgani, 23 kishi jarohat olgani haqida xabar bergan. Telekanal ma’lumotlariga ko‘ra, yo‘lovchi avtobusi tunda yo‘l chetiga o‘rnatilgan minaga uchragan. Hodisaning boshqa tafsilotlari ko‘rsatilmagan.
Keyinchalik, mamlakat Ichki ishlar vazirligi 11 kishi halok bo‘lganini tasdiqladi. Shu bilan birga, jabrlanganlar soni 28 taga yetganini ma’lum qildi.
Bundan avval 8-may kuni Kobuldagi qizlar maktabida bir nechta portlashlar sodir etilgan edi. So‘nggi ma’lumotlarga ko‘ra, hodisada 68 kishi halok bo‘lgan, aksariyati 11-15 yoshdagi o‘quvchi qizlar.
Ayni paytda shifokorlar Kobuldagi teraktdan jabrlangan kamida 160 kishining hayotini saqlab qolishga harakat qilmoqda.
Afg‘oniston prezidenti Ashraf G‘ani maktabdagi portlashlarni qoraladi va o‘nlab o‘quvchilarning o‘limiga sabab bo‘lgan portlashlar qurbonlari uchun 11-may, seshanba kuni Kobul va Logarda motam kuni deb e’lon qildi. Uning so‘zlariga ko‘ra, butun mamlakat bo‘ylab dafn marosimlari tashkil etiladi.
Afg‘oniston prezidenti birinchi vitse-prezidentga qurbonlarning oilalariga pul berishni buyurdi. Shuningdek, u ikkinchi vitse-prezidentga xavfsizlik rejasini ishlab chiqib, bu haqda ikki hafta ichida hisobot berishni topshirdi.
Ashraf G‘ani Kobuldagi portlashda “Tolibon” jangari guruhini aybladi.
“Tolibon’ jangarilari o‘zlarining razil maqsadlariga urush yordamida erisha olmasligini tushunishi kerak. Agar ular odamlarni o‘ldirishda davom etsa, yanada ko‘proq nafratga duchor bo‘ladi va afg‘on kuchlari ularni shafqatsizlarcha bostiradi”, — dedi G‘ani.
Qurbonlarning oilalari Afg‘oniston hukumati va G‘arb davlatlarini zo‘ravonlik va davom etayotgan urushni to‘xtata olmaganlikda ayblagan. Ayni vaqtda “Tolibon”ning o‘zi ham ushbu hujumni qoraladi.
Eslatib o‘tamiz, aprel oyida AQSh prezidenti Jozef Bayden Afg‘onistondan Amerika qo‘shinlarini olib chiqib ketish boshlanganini e’lon qilgan edi. Uning so‘zlariga ko‘ra, harbiylar mintaqada ularning oldiga qo‘yilgan barcha maqsadlarga erishgan. Qurolli kuchlar 11-sentabrgacha to‘liq chiqarib ketilishi rejalashtirilgan. Amerika va NATO mamlakatlari qo‘shinlari 29-apreldan chiqib ketishni boshlagan.
Oq uy Amerika prezidentining ma’muriyati Tinch okeani yo‘nalishiga e’tiborni jamlashni rejalashtirayotganini aytdi. Ayni vaqtda AQSh davlat kotibi Entoni Blinken Afg‘onistondan qo‘shinlar chiqarib ketilgach, mamlakatda hokimiyat tepasiga “Tolibon” jangarilari kelishi mumkinligini istisno qilmadi.
Izoh (0)