Ruminiya sog‘liqni saqlash vaziri Vlad Voykulesku tibbiy niqob taqmagani uchun 1,5 ming ley (360 dollar) miqdorida jarimaga tortildi. Bu haqda “Korrespondent.net” xabar berdi.

Vlad Voykulesku

Foto: Flickr

Ma’lumotlarga ko‘ra, 29-mart kuni jurnalistlar vazirni parlament vestibyulida boshqalar bilan tibbiy niqobini yechgan holda muloqot qilayotganida suratga tushirgan. Vazirning ta’kidlashicha, u niqobini chanqoq sababli yechgan. Shuningdek, vazir o‘sha paytda yonida hech kim bo‘lmaganini aytdi.

Keyinroq Voykulesku bu vaziyatda nohaq bo‘lganini tan oldi.

“Shubhasiz, men nohaq edim, barcha tanqidlar o‘rinli. Tartib-qoidaga amal qilish kerak”, — dedi Voykulesku.

Sog‘liqni saqlash vazirligi rahbari epidemiyaga qarshi choralarni buzgani uchun jarimaga tortilgan mamlakatdagi ikkinchi amaldor bo‘ldi. Mart oyining oxirida mehnat vaziri Raluki Turkan jamoat joyida tibbiy niqobsiz yurgani tushirilgan fotosurat sababli 500 ley (120 dollar) miqdorida jarimaga tortilgan edi.

Ruminiya bosh vaziri Florin Kitsu har ikki amaldordan belgilangan jarimani to‘lashni so‘raganini aytdi.

“Barcha ruminiyaliklar qonunni hurmat qilishi kerak”, — dedi u.

Mamlakatda tibbiy niqob taqish tartibi joriy etilgan. Barcha davlat va xususiy tashkilotlar imkon qadar xodimlarni masofaviy ishlash tartibiga o‘tkazishi belgilab qo‘yilgan. Bayram tadbirlarini o‘tkazish ta’qiqlangan. Shuningdek, yopiq bozorlar, yarmarkalar, ko‘rgazmalar faoliyati ham to‘xtatilgan. Cheklovlar 13-aprelgacha amal qiladi.

Avvalroq Ruminiyada OAV mudofaa vazirini maxfiy ma’lumotlarni oshkor qilganlikda aybladi. OAVga ko‘ra, Ruminiya mudofaa vaziri Nikolaye Chuke Facebook’dagi rasmiy sahifasida hushyorlikni yo‘qotib, maxfiy ma’lumotlarni o‘zi bilmagan holda oshkor qilib qo‘ygan.

Vazirlik rahbari parlamentariylarning aksar qismi bilan Sibiudagi Nikolaye Belchesku nomidagi quruqlik qo‘shinlari akademiyasiga tashrif buyurgan. Vaziyat tasvirga olingan suratlardan birida vazir bir nechta telefon raqamlari va maxfiy parollar yozilgan doska oldida turganini ijtimoiy tarmoqqa yuklagan. Oradan bir necha soat o‘tgach, vazirning Facebook’dagi sahifasi ma’murlari suratni o‘chirib tashlagan, biroq jurnalistlar bungacha skrinshotlar qilishga va fotosuratni boshqa ijtimoiy tarmoqlarda ham tarqatishga ulgurgan edi.