Жонс Ҳопкинс университети маълумотларига қараганда, дунёда коронавирусни юқтириб олганлар сони 158 355 838 кишига етди. Ушбу кўрсаткич бўйича доимгидек АҚШ (32,7 миллион), Ҳиндистон (22,6 миллион), Бразилия (15,1 миллион), Франция (5,8 миллион) ва Туркия (5 миллион) етакчилик қилмоқда. Глобал ўлимлар сони эса 3 293 719 кишини ташкил қилмоқда.
Германияда эмланган фуқаролар чекловлардан озод этилди
COVID-19’га қарши вакцина олган Германия фуқаролари 9 май, якшанбадан бошлаб мамлакатда хавфсизлик чоралари сифатида амал қилиб келаётган кўп сонли чекловлардан озод этилди.Эмланганлар, шунингдек, коронавирусдан кейин соғайганлар энди ижтимоий алоқалар сони бўйича чекловга риоя қилиши шарт эмас, шунингдек, энди уларга комендантлик соати тааллуқли бўлмайди. Гўзаллик салонларида ва бошқа сервисларда улардан манфий жавобли ПЗР-тест бошқа талаб қилинмайди.
Бундан ташқари, бу тоифадаги фуқаролар мамлакатга қайтиб келганидан кейин мажбурий карантинни ўташи керак бўлмайди (агар улар коронавирус мутациялари тарқалиши хавфи юқори бўлган мамлакатлар бўлмаса).
Аммо дўконларда, транспортда ва бошқа жамоат жойларида ниқоб тақиш мажбурияти сақланиб қолади.
Мамлакатнинг кўплаб ҳудудларида касалланганлар сони пасайиши туфайли, кўплаб федерал штатлар ҳукуматлари яқин ҳафталар ичида чекловларни юмшатишни кўриб чиқмоқда. Масалан, Германиядаги энг қатъий чекловлар жорий қилинган жойлардан бири — Баварияда 10 майдан ресторан, театр, кинотеатр ва пиво боғлари, 21 майдан эса меҳмонхоналар, кемпинглар ва дам олувчиларга ижарага бериш учун коттежлар очилади.
Туркманистон Ҳиндистонга гуманитар ёрдам юборади
Туркманистон президенти Гурбангули Бердимуҳамедов 8 май куни ҳукуматга коронавирус билан боғлиқ мураккаб вазият туфайли Ҳиндистонга гуманитар ёрдам юборишни топширди. Юк нималардан иборат бўлиши ва у қанча муддатда юборилишига аниқлик киритилмади.Ҳиндистонда коронавирус тарқалиши билан боғлиқ вазият апрель ойида кескин ёмонлашди. 7 май куни бир кеча-кундузда мамлакатда 414 188 киши COVID-19’га чалинган эди, бу эса рекорд кўрсаткич ҳисобланади.
Бундан аввал Туркманистон Россия ва Афғонистонга ҳам тиббий гуманитар ёрдам юборган эди.
Ҳукумат қайд этишича, Туркманистоннинг ўзини пандемия четлаб ўтган. Мамлакатда коронавирусга чалиниш билан боғлиқ бирорта ҳам ҳолат аниқланмаган.
Мавзуга доир: Ҳиндистонда COVID-19’га чалиниш бўйича янги рекорд ўрнатилди. Қозоғистон мамлакатга ёрдам юборади
Руминия ҳукумати Дракула қасрида COVID-19’га қарши вакцинация марказини очди
Трансилваниядаги Дракула қасрида коронавирусга қарши вакцинация маркази ташкил қилинди. Оқ халатларига вампирларга хос қозиқтиш тасвирлари туширилган тиббиёт ходимлари Мунтения ва Трансвилвания чегарасида жойлашган XIV асрга тааллуқли Бран қасрига ташриф буюрувчиларга Pfizer/BioNTech вакцинаси билан эмланишни таклиф қилмоқда. Қасрда эмланганларнинг барчасига махсус «Бран қасрида эмланган одам дипломи» ва Ўрта асрга хос қийноқ асбоблари кўргазмасига бепул чипта берилади.Пандемия бошидан буён Руминияда бир миллиондан ошиқроқ одам коронавирусга чалинган, қарийб 29 минг одам вафот этган.
Мамлакат ҳукуматининг маълум қилишича, сентябргача 10 миллион кишини эмлаш режалаштирилмоқда, аммо руминияликларнинг деярли ярми эмланмоқчи эмас, шу тариқа Руминия Европа мамлакатлари орасида вакциналарга қарши шубҳали кайфият энг кучли бўлганларидан бири бўлиб турибди.
Изоҳ (0)