Buxoroda O‘zbekistonga olib kirilayotgan avtokranni “yashartirib”, imtiyozni suiiste’mol qilishga uringan fuqarolar qilmishi fosh bo‘ldi

Buxoro viloyat Bojxona boshqarmasi tomonidan ikkita holatda bojxona to‘lovlari imtiyozini suiiste’mol qilish orqali hujjatlarni soxtalashtirib, yirik miqdordagi pullarni qo‘lga kiritmoqchi bo‘lgan shaxslar aniqlandi. Bu haqda “Daryo”ga viloyat Bojxona boshqarmasi axborot xizmati rahbari Javohir Ismoilov xabar berdi.

Ta’kidlanishicha, viloyat Bojxona boshqarmasi korrupsiyaga qarshi kurashish va o‘z xavfsizlik bo‘limi xodimlari tomonidan “G‘ijduvon” tashqi iqtisodiy faoliyat bojxona postida nazorat tadbiri o‘tkazilgan. Tadbirda fuqaro R.S. nomiga chetdan keltirilgan avtokranni bojxonada rasmiylashtirish jarayonida qing‘irlikka qo‘l urilgani aniqlangan. Hujjatlarda ushbu maxsus texnika 2020-yilda ishlab chiqarilgani qayd etilgan bo‘lsa-da, transport vositasi holatining ekspertiza natijalari buni tasdiqlamagan. Avtokran shassisida qo‘lbola usulda bajarilgan payvandlash izlari aniqlangan, shuningdek, kran kabinasidagi ma’lumotlar bitilgan yorliqlar ham qalbakilashtirilgani ma’lum bo‘lgan. Avtokran ehtiyot qismlarida esa uning 2016-yilda ishlab chiqarilganligini ko‘rsatuvchi yorliqlar mavjudligi aniqlangan. R.S. ma’lumotlarni soxtalashtirish orqali bojxona to‘lovlaridan 4,2 milliard so‘mlik imtiyozlarni qo‘lga kiritishni ko‘zlagan.

“Xuddi shunday holatlardan yana biri boshqarmaning korrupsiyaga qarshi kurashish va o‘z xavfsizlik bo‘limi hamda kontrabandaga qarshi kurashish va bojxona auditi bo‘limi xodimlari tomonidan aniqlandi. Fuqaro B.D. nomiga chetdan olib kelingan avtokran bojxona ko‘rigidan o‘tkazilganda, dastlabki xulosasida 2018-yilda ishlab chiqarilgani tasdiqlangan bo‘lsa-da, aslida 2012-yilda ishlab chiqarilgani ma’lum bo‘ldi. Ma’lumotlarni soxtalashtirish orqali bojxona to‘lovlaridan 3,2 milliard so‘mlik imtiyozlarni qo‘lga kiritishga uringan fuqaroning ham rejasi amalga oshmadi”, — dedi Javohir Ismoilov.

Aniqlanishicha, har ikkala holatda 7 milliard 422 million so‘mlik imtiyozlar bekor qilinib, bojxona to‘lovlari qayta hisoblangan. Ushbu holatlar yuzasidan esa surishtiruv harakatlari davom ettirilmoqda.