Бухоро вилоят Божхона бошқармаси томонидан иккита ҳолатда божхона тўловлари имтиёзини суиистеъмол қилиш орқали ҳужжатларни сохталаштириб, йирик миқдордаги пулларни қўлга киритмоқчи бўлган шахслар аниқланди. Бу ҳақда «Дарё»га вилоят Божхона бошқармаси ахборот хизмати раҳбари Жавоҳир Исмоилов хабар берди.
Таъкидланишича, вилоят Божхона бошқармаси коррупцияга қарши курашиш ва ўз хавфсизлик бўлими ходимлари томонидан «Ғиждувон» ташқи иқтисодий фаолият божхона постида назорат тадбири ўтказилган. Тадбирда фуқаро Р.С. номига четдан келтирилган автокранни божхонада расмийлаштириш жараёнида қинғирликка қўл урилгани аниқланган. Ҳужжатларда ушбу махсус техника 2020 йилда ишлаб чиқарилгани қайд этилган бўлса-да, транспорт воситаси ҳолатининг экспертиза натижалари буни тасдиқламаган. Автокран шассисида қўлбола усулда бажарилган пайвандлаш излари аниқланган, шунингдек, кран кабинасидаги маълумотлар битилган ёрлиқлар ҳам қалбакилаштирилгани маълум бўлган. Автокран эҳтиёт қисмларида эса унинг 2016 йилда ишлаб чиқарилганлигини кўрсатувчи ёрлиқлар мавжудлиги аниқланган. Р.С. маълумотларни сохталаштириш орқали божхона тўловларидан 4,2 миллиард сўмлик имтиёзларни қўлга киритишни кўзлаган.
«Худди шундай ҳолатлардан яна бири бошқарманинг коррупцияга қарши курашиш ва ўз хавфсизлик бўлими ҳамда контрабандага қарши курашиш ва божхона аудити бўлими ходимлари томонидан аниқланди. Фуқаро Б.Д. номига четдан олиб келинган автокран божхона кўригидан ўтказилганда, дастлабки хулосасида 2018 йилда ишлаб чиқарилгани тасдиқланган бўлса-да, аслида 2012 йилда ишлаб чиқарилгани маълум бўлди. Маълумотларни сохталаштириш орқали божхона тўловларидан 3,2 миллиард сўмлик имтиёзларни қўлга киритишга уринган фуқаронинг ҳам режаси амалга ошмади», — деди Жавоҳир Исмоилов.
Аниқланишича, ҳар иккала ҳолатда 7 миллиард 422 миллион сўмлик имтиёзлар бекор қилиниб, божхона тўловлари қайта ҳисобланган. Ушбу ҳолатлар юзасидан эса суриштирув ҳаракатлари давом эттирилмоқда.
Изоҳ (0)