Афғонистонда «Толибон» ҳаракати мусулмонларнинг муқаддас ойи — Рамазон якунида нишонланадиган ҳайит байрами муносабати билан уч кун давомида ҳарбий ҳаракатларни тўхташини эълон қилди. Бу ҳақда ғарб ОАВга таяниб, «Интерфакс» хабар берди.
ОАВ хабарига кўра, «Толибон» қўмондонлиги 10 май, душанба куни мамлакатда уч кун давомида ҳужум операцияларини тўхтатиш тўғрисида буйруқ чиқарди.
Бунга жавобан Афғонистон Миллий сулҳ бўйича Олий Кенгаши раиси Абдулла Абдулла мамлакатда доимий равишда амал қиладиган тинчлик битими тузиш зарурлигига ишора қилди.
«Биз мамлакатни инқироздан олиб чиқишнинг энг яхши ечими — тинчлик музокаралари йўлидаги ғовларни олиб ташлаш, узоқ муддатли сулҳ эълон қилиш ва жангларни абадий тўхтатиш деб ўйлаймиз», — дея Абдулланинг сўзларини келтиради ОАВ.
Шунингдек, ОАВ 2020 йили ҳам «Толибон» Рамазон ҳайити муносабати билан уч кунлик сулҳ эълон қилганини эслатмоқда.
Бир ҳафта олдин «Толибон» гуруҳи Гилменднинг маъмурий маркази — Лашкаргах шаҳри яқинида ҳужум уюштирган. Жангарилар дастлаб ҳарбийларни сиқиб чиқаришга муваффақ бўлган, кейин ҳаво ҳужуми ёрдамида қарши ҳужумни бошлаган.
Аввалроқ Афғонистоннинг Забул вилоятида мина қўйилган йўлдан ўтаётган йўловчи автобусининг портлаши оқибатида камида 16 киши ҳалок бўлгани ҳақида хабар берилганди.
Бундан аввал, 8 май куни Кобулдаги қизлар мактабида бир нечта портлашлар содир этилган эди. Сўнгги маълумотларга кўра, ҳодисада 68 киши ҳалок бўлган, аксарияти 11-15 ёшдаги ўқувчи қизлар.
Афғонистон президенти Ашраф Ғани Кобулдаги портлашда «Толибон» жангари гуруҳини айблади. Айни вақтда «Толибон»нинг ўзи ҳам ушбу ҳужумни қоралади.
Эслатиб ўтамиз, апрель ойида АҚШ президенти Жозеф Байден Афғонистондан Америка қўшинларини олиб чиқиб кетиш бошланганини эълон қилган эди. Унинг сўзларига кўра, ҳарбийлар минтақада уларнинг олдига қўйилган барча мақсадларга эришган. Қуролли кучлар 11 сентябргача тўлиқ чиқариб кетилиши режалаштирилган. Америка ва НАТО мамлакатлари қўшинлари 29 апрелдан чиқиб кетишни бошлаган.
Оқ уй Америка президентининг маъмурияти Тинч океани йўналишига эътиборни жамлашни режалаштираётганини айтди. Айни вақтда АҚШ давлат котиби Энтони Блинкен Афғонистондан қўшинлар чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмади.
Изоҳ (0)