«Ўзбекистон темир йўллари» АЖ халқаро темир йўл қатновларини босқичма-босқич тиклаш бўйича Қозоғистон ва Россия темир йўл маъмуриятларига мурожаат юборди. Бу ҳақда 7 май куни Миллий матбуот марказида бўлиб ўтган матбуот анжуманида хабар берилди.
Маълум қилинишича, ушбу мурожаат ҳар икки давлатнинг ваколатли давлат органлари томонидан ўрганиб чиқилмоқда ва яқин келажакда амалга оширилиши мумкин.
Шунингдек, мамлакат аҳолиси учун қўшимча қулайликлар яратиш, ички туризмни ривожлантириш мақсадида йўловчиларнинг таклифлари ўрганиб чиқилиб, ҳудудларда янги йўналишлар очилган. Хусусан:
- Термиз—Хива—Термиз;
- Андижон—Нукус—Андижон;
- Тошкент —Наманган—Андижон;
- Андижон—Наманган—Тошкент;
- Андижон—Хива—Андижон;
- Тошкент—Олот—Тошкент;
- Тошкент—Шовот йўналишларида поездлар қатнови йўлга қўйилди.
Шунингдек, 2021 йилда иккита тезюрар «Афросиёб» поезди олиб келинади. «Шуни алоҳида таъкидлаш керакки, мамлакатнинг тоғли шароити оғир ҳудудларида тезюрар поездлар қатнамайди, чунки ушбу модификациядаги поездни бундай участкаларда ишга тушириш мақсадга мувофиқ эмас, улар бундай ҳудудларда юқори тезликда ҳаракатлана олмайди», — дейилади хабарда.
Эслатиб ўтамиз, Ўзбекистонда илк бор коронавирус аниқланган 2020 йил 16 мартдан бошлаб темир йўл транспорти қатновлари тўхтатилган эди. 2020 йилнинг 15 августидан маҳаллий авиа ва темир йўл қатновлари босқичма-босқич тикланган.
Изоҳ (0)