Ukraina prezidenti Vladimir Zelenskiy mamlakat chegaralari yaqinida Rossiyaning 75 mingga yaqin qo‘shini borligini aytdi. Uning so‘zlariga ko‘ra, Moskva tomonidan tahdid hali barham topmagan, deb yozadi “RBK”.
“Bizning razvedkamiz o‘n minglab rus askarlari va texnikalari haligacha Ukraina bilan chegara hududida turgani haqida xabar beradi. Ma’lumotlarga ko‘ra, Qrimdan taxminan 3500 kishi olib chiqilgan. Boshqa o‘zgarishlarni ko‘rmadik, shuning uchun tahdid saqlanib qolmoqda”, — dedi Zelenskiy.
“Shuni mamnuniyat bilan tan olishimiz kerakki, Donesk va Lugansk viloyatlarining nazoratsiz hududlaridan uyushtiriladigan snayperlar hujumi kamaydi. Bu juda yaxshi, chunki shu yil aynan snayperlar o‘qidan juda ko‘p merganlar halok bo‘ldi”, — deya qo‘shimcha qildi Ukraina prezidenti.
Zelenskiy bu haqda Kiyevga tashrif buyurgan AQSh davlat kotibi Entoni Blinken bilan qo‘shma matbuot anjumanida bergan bayonotida aytib o‘tdi.
Blinken, o‘z navbatida, Rossiya “ma’lum miqdordagi qo‘shinlarini olib chiqib ketgani, ammo asosiy kuchlar Ukraina bilan chegarada qolayotganini aytdi. Uning qo‘shimcha qilishicha, AQSh vaziyatni diqqat bilan kuzatmoqda.
Zelenskiy AQShga qo‘llab-quvvatlov uchun minnatdorchilik bildirdi hamda Ukraina mustaqilligining 30 yilligi ikki tomonlama munosabatlar uchun asos bo‘lishidan umidvorligini aytdi.
Avvalroq Rossiya Ukraina chegaralaridan qo‘shinlarini qisman — faqat Qrimdan olib chiqishni boshlagani, ammo sharqiy chegaralar yaqinida, masalan, Voronej viloyatida harbiylar hali chekinmagani haqida xabar berilgandi.
Rossiya mudofaa vaziri Sergey Shoygu 22-aprel kuni janubiy chegaralardagi mashg‘ulotlardan so‘ng Rossiya qo‘shinlarini doimiy joylariga qaytarish to‘g‘risida buyruq bergan edi.
22-aprel kuni Qrimdagi Opuk poligonida Shoygu boshchiligida Janubiy harbiy okrug kuchlari va havo-desant kuchlari mashg‘ulotlarining asosiy bosqichi bo‘lib o‘tgan edi. Mashg‘ulotlarda 10 mingdan ortiq askar, 1200 ta qurol va harbiy texnika, shuningdek, 40 dan ortiq harbiy kema ishtirok etgan.
Wall Street Journal (WSJ) gazetasi Rossiyaning Qrim va Voronej viloyatidagi harbiy texnikalarining sun’iy yo‘ldoshdan olingan suratlarini chop etdi.
Avvalroq Fransiya prezidenti Emmanuel Makron, Germaniya kansleri Angela Merkel va Ukraina prezidenti Vladimir Zelenskiy Donbassdagi mojaroning avj olishiga yo‘l qo‘ymaslik uchun Rossiya o‘z qo‘shinlarini Ukraina bilan chegaradan olib ketishi kerakligini aytgandi.
Shuningdek, Bayden va Angela Merkel Rossiyani Ukraina bilan chegaradagi qo‘shinlarini olib ketishga chaqirgan edi. Ungacha Rossiya Ukraina chegarasiga va Qrimga 40 ming nafardan askar jo‘natgani haqida xabar berilgan. Ukraina prezidenti Vladimir Zelenskiy Rossiyani “jilovlash”da Baydendan yordam so‘ragan. Kreml esa Rossiya va Ukraina o‘rtasidagi urush ehtimolini istisno qilgan.
Izoh (0)