Rossiya Ukraina bilan chegaradan o‘z qo‘shinlarini olib ketadi

Rossiya mudofaa vaziri Sergey Shoygu mamlakat janubidagi harbiy mashg‘ulotlarda ishtirok etayotgan qo‘shinlarni 1-maygacha doimiy joylashtirilgan punktlarga qaytarishni buyurdi. Bu haqda Mudofaa vazirligiga tayanib, “RBK” xabar berdi.

“Men kutilmagan tekshiruvdan ko‘zlangan maqsadlarga to‘liq erishildi, deb o‘ylayman. Qo‘shinlar mamlakatning ishonchli mudofaasini ta’minlash qobiliyatini namoyish etdi. Shu munosabat bilan men Janubiy va G‘arbiy harbiy okruglardagi tekshiruvni yakunlash to‘g‘risida qaror qabul qildim”, — dedi vazir Qrimdagi yig‘ilishda.

“2021-yil 1-mayga qadar Janubiy harbiy okrugning 58-armiyasi, Markaziy harbiy okrugning 41-armiyasi, 7- va 76-havo hujumi va 98-havo-desant diviziyalari shaxsiy tarkibini doimiy joylashish punktlariga qaytaring”, — buyurdi Shoygu.

Xabarga ko‘ra, 23-aprelda qo‘shinlar janubiy chegaralardan qaytishni boshlaydi.

Ukraina prezidenti Vladimir Zelenskiy Rossiya qo‘shinlari olib chiqib ketilgandan keyin chegarada keskinlik pasayishini aytdi.

“Ukraina chegarasida qo‘shinlar sonining kamayishi keskinlikni mutanosib ravishda pasaytiradi”, — deb yozdi  Zelenskiy Twitter’da.

“Ukraina har doim hushyor holatda, ammo Donbassdagi harbiy kuchlarni kamaytirish va vaziyatni keskinlashtirish bo‘yicha har qanday qadamlarni ma’qullaydi. Ukraina tinchlikni istaydi. Yordam uchun xalqaro sheriklarga minnatdorlik bildiraman”, — deya qo‘shimcha qildi u.

22-aprel kuni Qrimdagi Opuk poligonida Shoygu boshchiligida Janubiy harbiy okrug kuchlari va havo-desant kuchlari mashg‘ulotlarining asosiy bosqichi bo‘lib o‘tdi. Mashg‘ulotlarda 10 mingdan ortiq askar, 1200 ta qurol va harbiy texnika, shuningdek, 40 dan ortiq harbiy kema ishtirok etdi.

Wall Street Journal (WSJ) gazetasi Rossiyaning Qrim va Voronej viloyatidagi harbiy texnikalarining sun’iy yo‘ldoshdan olingan suratlarini chop etdi.

Eslatib o‘tamiz, mart oyining oxirida butun dunyo Donbassdagi vaziyatning jiddiylashayotgani haqida gapira boshladi. Conflict Intelligence Team surishtiruv guruhi Rossiya qo‘shinlarining Rossiya—Ukraina chegarasi hududida to‘planishini 2014—2015-yillardan beri eng keskin ko‘rsatkich deb atadi. Kiyev o‘z chegaralari yaqinida rus qo‘shinlari to‘planganini tasdiqladi va uni “o‘z kuchini ko‘z-ko‘z qilish” deb atadi. AQSh Rossiyadan mazkur “provokatsiyalar”ga izoh berishni talab qildi.

Avvalroq Fransiya prezidenti Emmanuel Makron, Germaniya kansleri Angela Merkel va Ukraina prezidenti Vladimir Zelenskiy Donbassdagi mojaroning avj olishiga yo‘l qo‘ymaslik uchun Rossiya o‘z qo‘shinlarini Ukraina bilan chegaradan olib ketishi kerakligini aytgandi.

Shuningdek, Bayden va Angela Merkel Rossiyani Ukraina bilan chegaradagi qo‘shinlarini olib ketishga chaqirgan edi. Ungacha Rossiya Ukraina chegarasiga va Qrimga 40 ming nafardan askar jo‘natgani haqida xabar berilgan. Ukraina prezidenti Vladimir Zelenskiy Rossiyani “jilovlash”da Baydendan yordam so‘ragan. Kreml esa Rossiya va Ukraina o‘rtasidagi urush ehtimolini istisno qilgan.