Toshkentdagi Mirzo Ulug‘bek nomidagi “Markaziy bog‘” (Central Park) unga tashrif buyurganlarning 335 million so‘mdan ortiq pulini qaytarib beradi. Bu haqda Iste’molchilar huquqlarini himoya qilish agentligi xabar berdi.
Ushbu bog‘da karta tizimi amal qiladi. To‘lov kartaning orqa tomonida uning amal qilish muddat ko‘rsatilgan bo‘lib, muddat tugagandan so‘ng undagi mablag‘lar karta egasining arizasiga asosan xizmat ko‘rsatuvchi kassa tomonidan 3 kunlik muddatda yangi kartalarga o‘tkazib berilishi lozim.
Agentlikning aniqlashicha, Jet Invest MChJ QKga tegishli Central Park 2018-yildan buyon 130 ming nafar iste’molchiga bog‘da foydalanish kartalari rasmiylashtirib bergan, ulardan amal qilish muddati o‘tgan 18 291 tasidan karta egasini ogohlantirmasdan pul yechib olingan. Istirohat bog‘iga borgan iste’molchi kartadan foydalana olmagandan so‘nggina bu haqda xabar topgan. Iste’molchilarning kartalaridan yechib olingan jami mablag‘ 335,6 million so‘mni tashkil etgan.
Istirohat bog‘i ma’muriyatining ta’kidlashicha, bunga pandemiya paytida to‘lov tizimida yuzaga kelgan texnik nosozlik sabab bo‘lgan.
Agentlikning ko‘rsatmasiga asosan, bugungi kunga qadar mazkur istirohat bog‘i tomonidan 643 nafar iste’molchiga 14,8 million so‘m qaytarildi. Qolgan mablag‘larni ham o‘z iste’molchilariga o‘rnatilgan tartibda qaytarish davom etmoqda. Yechib olingan pulni qaytarib olish uchun iste’molchilar kassa xodimiga murojaat qilishi kerak. Shundan so‘ng kartadagi balans tekshiriladi va unda qolgan mablag‘ yangi kartaga o‘tkazib beriladi.
Avvalroq O‘zbekistondagi 140 ta dorixonada virusga qarshi va immunitetni oshiruvchi dorilarga 20 foiz o‘rniga 93 foizgacha ustama qo‘yilgani aniqlanib, ortiqcha olingan 2 million 800 ming so‘m pul iste’molchilarga qaytarilgandi. Shuningdek, Ucell mobil operatori tomonidan abonentlar hisob raqamidan noqonuniy yechib olingan 97 million so‘m egalariga qaytarilgandi.
Izoh (0)