Atrof-muhitni muhofaza qilish sohasidagi ikkita nodavlat tashkilot Lixtenshteyn knyazligining hukmron sulolasidan shahzoda Emanuelni Ruminiya hududidagi eng katta ayiqni ov musobaqasida o‘ldirishda ayblamoqda, deb xabar berdi Meduza.
Ruminiyaning Agent Green notijorat tashkilotining guvohlik berishicha, Avstriyaning Rigersburg hududida doimiy yashovchi shahzoda mamlakatning shimoli-g‘arbiy qismida joylashgan Transilvaniya tarixiy mintaqasidagi Ojdula kommunasida fermalarga hujum qilayotgan ayiqlarni otish uchun Ruminiya Atrof-muhit vazirligidan rasman ruxsat oldi. Hujjatga muvofiq, shahzodaga 12-martdan 16-martgacha ov qilish huquqi berildi.
Lekin ekofaollarning ta’kidlashicha, Emanuel boshqa ayiqlarni ov qilish o‘rniga, qo‘riqlanadigan kimsasiz hududda yashagan va bir necha yil ekologlar nazorati ostida bo‘lgan Artur laqabli 17 yoshli qo‘ng‘ir ayiqni otgan. Agent Green Arturni Yevropa Ittifoqidagi eng yirik ayiq deb e’tirof etgan edi.
Tashkilot taqdim etgan hujjatlarga ko‘ra, Arturni o‘ldirgani uchun shahzoda mumkin bo‘lgan 600 balldan 592,8 reyting ballini qo‘lga kiritgan — bu ov musobaqasidagi rekord natija hisoblanadi. Emanuel ayiqni ovlagani uchun 7 ming yevro to‘lagan, deb qo‘shimcha qildi The Guardian nashri.
Shahzodaning vakillari OAVga vaziyat yuzasidan izoh berishdan bosh tortdi. Ruminiya Atrof-muhit vazirligi voqea yuzasidan tergov-surishtiruv ishlari boshlanganini ma’lum qildi.
2016-yilda Ruminiyada ov musobaqasi taqiqlangan, qo‘ng‘ir ayiqlar esa xalqaro va mahalliy qonunlarga muvofiq himoya qilinadi. Hukumat faqat vaqti-vaqti bilan mahalliy aholining hayotiga tahdid soladigan hayvonlarni otish uchun maxsus ruxsatnomalar beradi.
Izoh (0)