Атроф-муҳитни муҳофаза қилиш соҳасидаги иккита нодавлат ташкилот Лихтенштейн князлигининг ҳукмрон сулоласидан шаҳзода Эмануэлни Руминия ҳудудидаги энг катта айиқни ов мусобақасида ўлдиришда айбламоқда, деб хабар берди Meduza.
Руминиянинг Agent Green нотижорат ташкилотининг гувоҳлик беришича, Австриянинг Ригерсбург ҳудудида доимий яшовчи шаҳзода мамлакатнинг шимоли-ғарбий қисмида жойлашган Трансилвания тарихий минтақасидаги Ождула коммунасида фермаларга ҳужум қилаётган айиқларни отиш учун Руминия Атроф-муҳит вазирлигидан расман рухсат олди. Ҳужжатга мувофиқ, шаҳзодага 12 мартдан 16 мартгача ов қилиш ҳуқуқи берилди.
Лекин экофаолларнинг таъкидлашича, Эмануэл бошқа айиқларни ов қилиш ўрнига, қўриқланадиган кимсасиз ҳудудда яшаган ва бир неча йил экологлар назорати остида бўлган Артур лақабли 17 ёшли қўнғир айиқни отган. Agent Green Артурни Европа Иттифоқидаги энг йирик айиқ деб эътироф этган эди.
Ташкилот тақдим этган ҳужжатларга кўра, Артурни ўлдиргани учун шаҳзода мумкин бўлган 600 баллдан 592,8 рейтинг баллини қўлга киритган — бу ов мусобақасидаги рекорд натижа ҳисобланади. Эмануэл айиқни овлагани учун 7 минг евро тўлаган, деб қўшимча қилди The Guardian нашри.
Шаҳзоданинг вакиллари ОАВга вазият юзасидан изоҳ беришдан бош тортди. Руминия Атроф-муҳит вазирлиги воқеа юзасидан тергов-суриштирув ишлари бошланганини маълум қилди.
2016 йилда Руминияда ов мусобақаси тақиқланган, қўнғир айиқлар эса халқаро ва маҳаллий қонунларга мувофиқ ҳимоя қилинади. Ҳукумат фақат вақти-вақти билан маҳаллий аҳолининг ҳаётига таҳдид соладиган ҳайвонларни отиш учун махсус рухсатномалар беради.
Изоҳ (0)