Texasda Robert Franklin ismli erkak quvvatlantirishda turgan iPhone 6 smartfoni portlab ketgani va ushbu holat natijasida jarohat olgani sabab Apple kompaniyasini sudga berdi, deb yozadi IXBT.
Da’vogarning ta’kidlashicha, iPhone 6 smartfoni akkumulyatori nosoz bo‘lgan, shu sababli quvvatlanish vaqtida sezilarli darajada qizigan. Portlash 2019-yilning 15-avgustida sodir bo‘lgan, iPhone 6 smartfonining o‘zi esa 2018-yilda xarid qilingan.
Smartfon foydalanuvchisi o‘z da’vo arizasida shu kuni iPhone 6 orqali musiqa tinglayotgan bo‘lganini ma’lum qilgan. To‘satdan musiqa to‘xtab qolgan, Franklin muammo nimada ekanligini aniqlash uchun telefonni qo‘liga olganida portlash yuz bergan. Portlash oqibatida Robert Franklining ko‘zi va yuziga shikast yetgan. Shuningdek, erkak kutilmagan holatdan yiqilib tushib, bilagini chiqarib olgan.
Manbaning qo‘shimcha qilishicha, Franklin kompensatsiya sifatida jami 5 million dollardan ortiq mablag‘ talab qilmoqda.
iPhone 6 esa qay holda — yangi yoki ishlatilgan — xarid qilingani noma’lum.
Avvalroq Avstraliyada hamyonida iPhone smartfoni yonib ketgan erkak Apple’ni sudga bergan edi. 2020-yilda esa AirPods naushniklari xitoylik erkakning qulog‘ida portlab ketgandi.
Izoh (0)