Техасда Роберт Франклин исмли эркак қувватлантиришда турган iPhone 6 смартфони портлаб кетгани ва ушбу ҳолат натижасида жароҳат олгани сабаб Apple компаниясини судга берди, деб ёзади IXBT.
Даъвогарнинг таъкидлашича, iPhone 6 смартфони аккумулятори носоз бўлган, шу сабабли қувватланиш вақтида сезиларли даражада қизиган. Портлаш 2019 йилнинг 15 августида содир бўлган, iPhone 6 смартфонининг ўзи эса 2018 йилда харид қилинган.
Смартфон фойдаланувчиси ўз даъво аризасида шу куни iPhone 6 орқали мусиқа тинглаётган бўлганини маълум қилган. Тўсатдан мусиқа тўхтаб қолган, Франклин муаммо нимада эканлигини аниқлаш учун телефонни қўлига олганида портлаш юз берган. Портлаш оқибатида Роберт Франклининг кўзи ва юзига шикаст етган. Шунингдек, эркак кутилмаган ҳолатдан йиқилиб тушиб, билагини чиқариб олган.
Манбанинг қўшимча қилишича, Франклин компенсация сифатида жами 5 миллион доллардан ортиқ маблағ талаб қилмоқда.
iPhone 6 эса қай ҳолда — янги ёки ишлатилган — харид қилингани номаълум.
Аввалроқ Австралияда ҳамёнида iPhone смартфони ёниб кетган эркак Apple’ни судга берган эди. 2020 йилда эса AirPods наушниклари хитойлик эркакнинг қулоғида портлаб кетганди.
Изоҳ (0)